web counter
LEXO PA REKLAMA!

SHKARKO APP

App Store
Google Play

E fundit!

x

Napoli-Inter premton spektakël/ Conte largon presionin, Inzaghi: Nuk është vendimtare

28 Shkurt 2025, 22:00, Sport CNA

Napoli-Inter premton spektakël/ Conte largon presionin, Inzaghi: Nuk

Napoli-Inter është padyshim kryesfida e javës së 27-të në Serinë A. Përballen dy ekipet që janë në garë për titullin kampion dhe spektakli është i garantuar.

Interi vjen në këtë përballje si kryesues, por diferenca me Napolin është vetëm 1 pikë dhe për këtë arsye do të jetë një takim shumë i luftuar.

Trajneri i Interit, Simone Inzaghi, në konferencën për shtyp, deklaroi se është një ndeshje shumë e rëndësishme, por jo vendimtare. Gjithashtu ai vlerësoi maksimalisht kundërshtarin, duke thënë se kanë lojtarë dhe trajner të shkëlqyer.

“Do të përballen dy ekipet më të mira. Duhen uruar Interi dhe Napoli për rrugën që kanë bërë deri tani. Do të jetë një ndeshje e rëndësishme, por jo vendimtare. Kanë mbetur edhe 12 ndeshje për tu luajtur, ndërsa në lojë janë edhe 36 pikë. E dimë nga e kemi nisur dhe cilat janë objektivat tona, sepse ne jemi Interi. Duam të luajmë sa më shumë ndeshje.

Ne jemi nga të paktat skuadra në Evropë që jemi në garë për tre trofe. Është një burim krenarie dhe duket të mendojmë ndeshje pas ndeshje.

Napoli ka lojtarë të shkëlqyer dhe një trajner të madh. Dinë se çfarë bëjnë dhe ne i kemi studiuar. Duhet t’i kushtojmë vëmendje detajeve, në të tilla ndeshje ato bëjnë diferencën. Ata kanë ndryshuar modulin dhe sistemin e tyre. Do të jetë një ndeshje e bukur mes dy skuadrave të shkëlqyera që e meritojnë të jenë këtu”, u shpreh Inzaghi.

Në krahun tjetër, trajneri i Napolit, Antonio Conte tentoi të heqë presionin nga ekipi i tij, duke thënë se e kanë merituar vendin në renditje.

“Përtej renditjes, e prisja që Napoli pas shtatë muajve të kishte marrë formë. Fakti që jemi në garë për vendin e parë, na mbush me krenari. Nuk duhet të kemi presion. Ia thashë edhe djemve. Duhet që lojtarët ta shijojnë këtë moment. E kemi merituar këtë renditje.

E rëndësishme është që të largohemi nga ndeshja, me bindjen se kemi dhënë maksimumin, edhe nëse humbasim. Mund të them se deri tani kemi qenë mirë dhe nuk kemi pasur shumë dëmtime. Jemi skuadra e tretë me më pak lëndime. Kryesisht në çdo vend që kam qenë, kam pasur pak dëmtime”, deklaroi Conte.  

Napoli-Inter do të luhet këtë të shtunë, në stadiumin “Diego Maradona”, duke nisur nga ora 18:00.





Lajmet e fundit nga