web counter
LEXO PA REKLAMA!

SHKARKO APP

App Store
Google Play

Çmenduri arabe për Sergio Ramosin

30 Mars 2023, 16:45, Sport CNA

Klubet e Arabisë Saudite duket se kanë nisur një garë të çmendur milionash për të rivalizuar njëri-tjetrin dhe afrimi i Kristiano Ronaldos duket se është vetëm hapi i parë i transformimit të kampionatit në këtë vend në një “Kinë të dytë”. Ashtu siç bënë në Azi disa vite të parë duke ofruar rroga të çmendura, edhe sauditët nuk po përmbahen dhe këtë e tregon më së miri oferta që raportohet se i është bërë Serxhio Ramos.

Mbrojtësi nuk ka marrë ende një ofertë rinovimi nga PSG dhe në fund të sezonit do të jetë i lirë për t’iu bashkuar çdo klubi tjetër. Kjo e ka bërë atë një emër tundues për shumëkënd. Sipas “L’Equipe”, i pari në listë është klubi i Al Hilal në Arabinë Saudite, i cili kërkon të përforcohet duke u mbështetur edhe nga ndihma e shtetit që synon organizimin e Botërorit 2030.

Gazeta franceze bën të ditur se propozimi i parë është 30 milionë euro neto në sezon, shumë më tepër se sa mund të përfitojë te PSG që nuk i afrohet kësaj shifre. Dhe sipas “AS” në Spanjë, Al Hilal është gati të arrijë deri në 50 milionë euro në sezon, një shifër e pabesueshme për një futbollisti i cili nuk është në kulmin e moshës. Përballë rreth 10 milionë eurove në vit që përfiton te PSG dhe ofertës së çmendur nga Arabia Saudite, pakkush ka dyshime se e ardhmja e tij do të jetë si rival i Kristiano Ronaldos dhe jo një tjetër tentativë për të fituar Ligën e Kampioneve.





Lajmet e fundit nga