web counter
LEXO PA REKLAMA!

SHKARKO APP

App Store
Google Play

E fundit!

x

Luhet për finalen e madhe, Inter-Barça premton spektakël

6 Maj 2025, 11:29, Sport CNA

Luhet për finalen e madhe, Inter-Barça premton spektakël


Inter-i dhe Barcelona do të përballen mes tyre në takimin e kthimit në gjysmëfinalen e Ligës së Kampioneve, ku do të kërkojnë me çdo kusht fitoren. Barazimi spektakolar në rezultatin 3-3 në ndeshjen e parë, ka lënë gjithçka të hapur për kualifikimin në finale. Katalanasit po kalojnë një sezon ëndrrash, ku deri tani kanë fituar dy trofetë, ndërsa janë në garë edhe për dy të tjerë. Megjithatë, Inter-i ka treguar se është një kockë e fortë për çdo kundërshtar dhe është e vështirë të zgjedhësh një favorit. 

Në prag të kësaj përballjeje, trajneri i zikaltërve, Simone Inzaghi, vlerësoi maksimalisht kundërshtarin, kryesisht yllin e katalanasve, Lamine Yamal. 

“Duhet të luajmë një ndeshje të shkëlqyer, kundër një skuadre shumë të fortë që tani e njohim edhe nga afër. Na duhet të jemi të vëmendshëm dhe të kthjellët në fushë. Në ndeshjen e parë bëmë paraqitje të shkëlqyer, por sigurisht mund të kishim bërë më mirë. Gjithsesi, ekipi bëri mirë dhe në takimin e kthimit duhet të bëjmë të njëjtën gjë. Praktikisht është një finale e parakohshme, sepse barazimi lë gjithçka të hapur. Grupi është i etur dhe po stërvitet mirë. Në fushë ndaj Barcelona-s duhet një Inter i shkëlqyer. Jemi vetëm dy ndeshje larg trofeut të madh. Ndeshje të tilla janë emocionuese. Trofetë shpërblejnë punën e bërë. Duhet të përpiqemi të mos e lejojmë Yamal-in që të marrë topin. Është lojtar i veçantë dhe sigurisht që do të ketë dyfish në mbulim. Është një talent i jashtëzakonshëm kur ka topin dhe skuadra e kërkon kur është në vështirësi”, deklaroi Inzaghi. 

Në krahun tjetër, trajneri i Barcelona-s, Hansi Flick, tha se ekipi i tij duhet të luajë në grup dhe ta shijojë këtë moment, për të arritur finalen. Tekniku gjerman zbuloi se Robert Lewandowski do ta nisë ndeshjen nga stoli. 

“Kur filloi sezoni, askush nuk e kishte idenë se çfarë mund të bënim. Deri tani kemi fituar dy trofe dhe po vijnë javët më të rëndësishme. Në këtë nivel është normale që të jetë kështu. Ekipi duhet të arrijë sukseset duke punuar në grup. Dua që të bëjnë klubin dhe tifozët krenarë. Kemi analizuar gjithçka nga ndeshja e parë. Në goditjet standarde duhet të mbarohemi më mirë. Lewandowski do ta nisë ndeshjen nga stoli. Nëse do të kemi nevojë për ndihmën e tij, do ta aktivizojmë. Kemi lojtarë të jashtëzakonshëm në ekip dhe Yamal është njëri prej tyre. Ajo që ai bën me topin është e pabesueshme, duke dhënë çdo pasim të saktë. Çdo lojtar përmirësohet pas ndeshjeve që luan. Jemi në gjysmëfinale dhe duhet ta shijojmë këtë. Lojtarët e mi nuk dorëzohen kurrë. Interi ka një skuadër të shkëlqyer dhe disa lojtarë të fortë”, u shpreh Flik. 

Ndeshja Inter-Barcelona do të luhet mbrëmjen e kësaj të marte, duke nisur nga ora 21:00, në stadiumin “San Siro”.  





Lajmet e fundit nga