web counter
LEXO PA REKLAMA!

SHKARKO APP

App Store
Google Play

Lautaro rikthehet ndaj rrogozhinasve, shanse edhe për Asllanin

12 Gusht 2023, 18:45, Sport CNA

Kapiteni i Interit, Lautaro Martinez, pritet të rikthehet në fushë në miqësoren kundër Egnatias, që zikaltrit do të luajnë të dielën në orën 20:00 në stadiumin “Paolo Mazza” të Ferrarës. Mediat italiane kanë raportuar dje se sulmuesi argjentinas ka lënë pas problemin muskulor dhe është stërvitur normalisht me grupin gjatë ditëve të fundit.

Dyshja Lautaro-Turam do të ribashkohen në sulmin interist pikërisht të dielën, që do të jetë si provë gjenerale për Interin para startit të Serisë A. Zikaltrit presin më 19 gusht Monzën për javën e parë të kampionatit dhe pritet që trajneri Simone Inzagi të hedhë në fushë ndaj Egnatias formacionin më të mirë. Dyshimi i vetëm në mesfushë është nëse do të luajë Asllani apo Çalhanoglu nga minuta e parë.

Për Inzagin është shumë e rëndësishme që Lautaro ka rikapur formën, teksa për shkak të mbingarkesës u la jashtë miqësores ndaj Salcburgut tri ditë më parë. Trajneri zikaltër pret që edhe francezi i sulmit, Turam, të zhbllokohet në këtë miqësore, pasi deri më tani ka pasur pak ndikim me performancën e tij dhe nuk ka mundur të lërë gjurmë.

Nëse për Egnatian është një test luksi, për Interin është si nxehje para startit, me Inzagin që mund të bëjë eksperimente me formacionin.





Lajmet e fundit nga