Kvaratskhelia e mbyll me Napolin, synohet një shqiptar si zëvendësues

12 Janar 2025, 19:49, Sport CNA

Kvaratskhelia e mbyll me Napolin, synohet një shqiptar si

Khvicha Kvaratskhelia ka vendosur të largohet nga Napoli. Lajmi është konfirmuar nga trajneri, Antonio Conte, që e cilësoi situatën si një zhgënjim personal dhe profesional. Conte pranoi se, pavarësisht përpjekjeve të tij të vazhdueshme për ta mbajtur lojtarin në qendër të projektit, Kvarashkelia ka mbetur i palëkundur në vendimin e tij.

Trajneri italian zbuloi se dëshira e lojtarit për t’u larguar nuk është një zhvillim i papritur, pasi këtë e ka kërkuar që në verë, por Napoli refuzoi ta shiste me shpresën se do të arrinte ta bindte për të qëndruar.

“Kvaratskhelia ka kërkuar largimin. Fola me djaloshin që më konfirmoi këtë vendim, dhe unë jam shumë i zhgënjyer. Nuk arrita ta bindja për projektin tonë, edhe pse gjashtë muajt e fundit kanë qenë një përpjekje e vazhdueshme nga ana ime për t’i treguar se ai ishte pjesë thelbësore e skuadrës.

Në verë, kur fola me presidentin, kërkova që disa lojtarë të ishin të paprekshëm. Kvarashkelia ishte një nga ata. Por ai qëllim nuk u realizua siç shpresoja. Sot ndjej zhgënjim të madh, sepse kam kaluar shumë kohë duke e ndërtuar projektin tonë rreth tij.”

Sipas raportimeve të fundit, interesimi i Paris Saint Germain ka qenë katalizatori i kësaj situate. Klubi francez ka arritur një marrëveshje verbale me Kvarën, duke i ofruar një pagë prej 8 milionë eurosh në sezon për pesë vitet e ardhshme. Ky propozim duket të jetë shumë i vështirë për t’u refuzuar nga lojtari, i cili ka shprehur dëshirën për të nisur një aventurë të re.

Megjithatë, Napoli ka bërë të qartë që nuk do të lejojë një largim të lehtë. Klubi kërkon një shumë prej 90 milionë eurosh për kartonin e 23-vjeçarit dhe nuk dëshiron të përfshijë lojtarë të tjerë në marrëveshje.

Ndërkohë që bisedimet për transferimin e gjeorgjianit vazhdojnë, Napoli ka nisur tashmë kërkimet për zëvendësuesin e tij. Në krye të listës së tyre është sulmuesi i Kosovës, Edon Zhegrova, i cili ka shkëlqyer me Lilën në Francë. Napoli është i gatshëm të ofrojë 50 milionë euro për kartonin e 25-vjeçarit, ndërsa Lila po heziton të privohet nga një prej lojtarëve të saj më të rëndësishëm.