E fundit!

07:38 Kosova & Bota

Mbi 800 vatra aktive zjarri në Kanada/ Tymi arrin në SHBA, shkakton alarm për cilësinë e ajrit

Mbi 800 zjarre pyjore vazhdojnë të digjen në të gjithë Kan...

Barazimi në kampionat, shpërthen Conceicao: Më e dobëta që kam parë në karrierë

12 Janar 2025, 15:02, Sport CNA

Barazimi në kampionat, shpërthen Conceicao: Më e dobëta

Pas euforisë së triumfit në Superkupë, Milan-i është rikthyer në një realitet të hidhur në kampionat, me rezultatet zhgënjyese ndaj skuadrave të vogla. Barazimi 1-1 ndaj Cagliari-t, një skuadër që lufton për mbijetesë, ka lënë një shije të hidhur në ambientin kuqezi dhe sidomos për trajnerin Sergio Conceicao, i cili nuk ka ngurruar të shprehë hapur zhgënjimin e tij për paraqitjen e skuadrës.

Në përfundim të ndeshjes, Conceicao foli me tone kritike ndaj lojës së ekipit të tij, duke pranuar se pritshmëritë ishin shumë më të larta.

“Prisja shumë, shumë më tepër, në të gjitha aspektet. Kam 13 vite si trajner dhe, duke krahasuar cilësinë e këtij grupi me atë që pashë në fushë, pjesa e parë e kësaj ndeshjeje ishte më e dobëta që kam parë në karrierën time si trajner. Pjesa e dytë ishte më e mirë, por ende larg asaj që duhet të japim.

E kuptoj që strategjia e kundërshtarit ishte të humbnin kohë, siç ndodh shpesh në futbollin italian, por arbitri duhet të kishte shtuar më shumë se pesë minuta shtesë. Megjithatë, kjo nuk është një justifikim. Secili prej nesh duhet të kishte bërë më shumë. Disa gjëra duhet të thuhen, sepse janë të domosdoshme.”, u shpreh tekniku portugez.

Conceicao nuk i kurseu kritikat as ndaj sulmuesve të tij, duke vënë në dukje se ndonjëherë dëshira për të bërë gjithçka perfekt shkakton humbje kohe dhe efikasiteti. Megjithatë, ai pranoi përgjegjësinë si lider i skuadrës dhe premtoi se do të punojë për ta rikthyer ekipin në rrugën e duhur.

“Sulmuesit e mi nuk janë egoistë, dhe kjo më pëlqen, por ndonjëherë ata duhet të jenë më të thjeshtë. Gjithmonë duket sikur kërkojnë të bëjnë prekjen magjike. Futbolli është i thjeshtë, dhe ndonjëherë duhet të përqendrohesh tek baza, jo tek spektakli.

Unë jam ai që duhet ta nxjerr ekipin nga kjo situatë, por nuk mund ta bëj i vetëm. Duhet ta bëjmë së bashku, si ekip. Nëse jemi më kërkues jashtë fushe, duhet të jemi edhe më kërkues brenda saj.”, deklaroi Conceicao.

Milani është karakterizuar nga oshilacione të shumta këtë sezon. Kuqezinjtë kanë treguar paraqitje të shkëlqyera ndaj ekipeve të mëdha si Real Madrid, Juventus dhe Inter, por problem kanë qenë skuadrat e vogla.

Vendi i tetë në renditje, është shumë pak për një skuadër me emër si Milani, që sezonin e nisi me pritshmëri të mëdha, por tashmë rrezikon edhe zonën Champions.