Finalja Real-Barça/ Flick kërkon kujdes, Ancelotti: Nuk ka dramë edhe nëse humbasim

11 Janar 2025, 20:02, Sport CNA

Finalja Real-Barça/ Flick kërkon kujdes, Ancelotti: Nuk ka

Real Madrid dhe Barcelona do të përballen në “El Clasico” e dytë të sezonit, por këtë herë ndeshja merr një rëndësi më të veçantë.

Dy skuadrat do të luajnë në finalen e Kupës, në një sfidë që vlen për trofe. Spektakli është i garantuar, ndërsa pritet luftë e fortë sportive në Arabinë Saudite, aty ku do të luhet ndeshja.

Në prag të kësaj finaleje, trajneri i madrilenëve, Carlo Ancelotti theksoi rëndësinë që ka ndeshja, por shtoi se edhe në rast se skuadra e tij nuk fiton, nuk duhet bërë dramë, sepse sezoni vazhdon.

"Po vijmë mirë, si gjithmonë para një finaleje. Me shumë entuziazëm dhe dëshirë. Problemet që kishim ndaj Majorkës janë zgjidhur, të gjithë lojtarët janë në dispozicion. Një finale kundër Barcelonës është gjithmonë speciale dhe shton presionin. Është një kundërshtar historik dhe ndeshjet ndaj tyre janë gjithmonë shumë të luftuara. Do të jetë shumë e vështirë për ne, por edhe për ata. Ky trofe ka vlerë. Kur e fitojmë Superkupën, sezoni përfundon i mirë, duke fituar La Ligën dhe Champions-in. Është një ndeshje që të jep shumë dinamikë për ta vazhduar mirë sezonin. Duhet të mendojmë për humbjen e parë 4-0 dhe për atë që ndodhi në atë ndeshje. Ata na mundën, ndërsa ne kemi bërë një vlerësim të gabimeve tona. Kishim probleme në pjesën e dytë, ndaj duhet t’i shmangim ato gabime. Një klasike është gjithmonë e paparashikueshme, shoqërohet me shumë presion, sidomos kur është finale ndaj Barcelonës. Edhe në rast humbjeje, sezoni vazhdon. Është një finale dhe jemi afër një tjetër titulli, por jam i vetëdijshëm se në futboll gjithçka mund të ndodhë. Ekipi ka përmirësuar shumë, askush nuk mund ta mohojë këtë. Një humbje nuk do të ishte e mirë, por ekipi do të ecë përpara", u shpreh Ancelotti.

Në krahun tjetër, trajneri i Barcelonës, Hansi Flick vlerësoi maksimalisht kundërshtarin, duke thënë se mund të ndëshkojnë nga momenti në moment. Sipas tij, katalanasit duhet të bëjnë një ndeshje më të mirë sesa ajo ndaj Bilbaos në gjysmëfinale, ku fituan 2-0.

“Si një ekip, ne duhet të tregojmë forcë dhe unitet. Fitorja nw “El Clasico” do të ishte një nxitje e madhe e besimit për sezonin. Do të ishte një arritje e jashtëzakonshme për klubin dhe një moment i paharrueshëm për tifozët tanë. Kundër Real Madridit, ne duhet të luajmë shumë mirë dhe të kujdesemi për ta në tranzicion. Ne duhet të përmirësojmë gabimet që bëmë kundër Athletic Bilbao”, përfundoi trajneri gjerman. Janë 90 minuta. Po flasim për Real Madridin, një nga skuadrat më të mira në botë. Ne duhet të luajmë shpejt dhe më mirë se kundër Bilbaos. Ata dinë ta menaxhojnë lojën dhe mund të përfitojnë nga çdo mundësi, kështu që do të duhet të luajmë në nivelin tonë më të mirë. Olmo mund të luajë. Ai është i lumtur. Kam qenë trajner në shumë finale. Është një lojë e madhe, një Klasike. Nëse ka shumë zhurmë, duhet të jemi më të fortë. Duhet të përqendrohemi, të mos ndikohemi nga gjërat që ndodhin jashtë dhe të jemi bashkë”, deklaroi Flick.

Finalja e Superkupës së Spanjës, mes Real Madrid dhe Barcelonës, do të luhet ditën e diel, duke nisur nga ora 20:00.