E fundit!

22:51 Aktualitet

Biznesmeni Artur Shehu thyen heshtjen: Jam pronar i vjetër i tokës në Zvërnec, nuk i njoh fare investitorët

Biznesmeni shqiptar Artur Shehu ka folur në emisionin Opin...

Kush është djaloshi nga Prizreni që debutoi dje me Bajernin në Bundesligë?

12 Shkurt 2023, 14:07, Sport CNA

Arijon Ibrahimoviç nuk ka asnjë lidhje me gjigantin suedez të Milanit, përveç talentit që kanë të dy në futboll. Bëhet fjalë për talentin 17-vjeçar të Bajernit të Mynihut, që debutoi pasditen e sotme në Bundesligë.

Nuk ka rëndësi nëse talenti rritet në shtëpi, apo evidentohet nga skautët, por vlen të theksohet se është gjithmonë i pranishëm te Bajerni i Mynihut. Ndodh kështu gjithmonë dhe kjo edhe për fakti nëse bavarezët u japin mundësinë të tregojnë veten në fushë.

Nga Jamal Musiala te Paul Wanner, pa harruar Mathyjs Tel, janë disa nga të rinjtë e talentuar që po tregojnë veten në organikën e Bajernit. Më i fundit që u shtohet, është padyshim Arijon Ibrahimovic. Ky i fundit ka tërhequr vëmendjen jo vetëm me mbiemrin, por edhe me atë që ka bërë në ekipet e moshave.

Kush është Arijon Ibrahimovic? - Mbiemri shkakton kuriozitet, por Arijon nuk ka asnjë lidhje me Zlatan Ibrahimovic. I njohur edhe si Arijon Ibrahimi, 17-vjeçari është djali i dy prindërve nga Prizreni dhe ka lindur në Nuremberg. Pikërisht këtu ka nisur edhe futbollin me ekipet e moshave.

Më pas kaloi te moshat e Greuther Furth, ndërsa në 2018-ën, kur ishte vetëm 12 vjeç, iu bashkua Bajernit të Mynihut. Arijoni ka luajtur gjithmonë me më të mëdhenjtë, aq sa në moshën 15-vjeçare debutoi në ekipin U-19 të Bajernit. Dhe çfarë debutimi, duke dominuar në kampionat, me 7 gola dhe 14 asiste, ndaj lojtarëve tri vite më të mëdhenj.

Hapi i madh - Emri i tij ka qenë gjithmonë në listën e drejtuesve, por edhe në vëmendjen e tifozëve. Megjithatë për herë të parë iu bashkua skuadrës së Nagelsmanit në përgatitjet dimërore. Më pas, për shkak të disa të prekurve me COVID-19, trajneri bavarez e mori në pankinë në ndeshjen ndaj Borussia Monchengladbach, bashkë me Paul Wanner.

E nëse ky i fundit debutoi, Ibrahimovic do të duhej të priste ende. Iu desh të qëndronte në pankinë edhe tri herë të tjera, për të ardhur te pasditja e sotme. Me fitoren në xhep, pasi kryesonte 3-0 ndaj Bochum, Nagelsmann vendosi të largojë Sane dhe t’i besojë djaloshit me origjinë nga Prizreni.

Ndërkohë, këtë sezon Ibrahimovic po shkëlqen me skuadrën U-19, pasi ka shënuar 15 gola dhe furnizuar 7 asiste. Ai ka debutuar edhe me Gjermaninë U-18, duke shënuar që në ndeshjen e parë ndaj Republikës Çeke.

Pikat e forta të Arijon Ibrahimoviç - Arijon Ibrahimovic mund të identifikohet si një mesfushor ofensiv, por shpesh ka luajtur edhe si mesfushor krahu. Megjithatë, pavarësisht pozicionit, ka tendencën të futet gjithmonë në brendësi dhe të shkojë deri në zonën kundërshtare.

Pika e tij më e fortë është topi në këmbë: driblimi, kontrolli, teknika në ecje, etj., por edhe goditjet nga distanca, siç tregohet në video. Është një makth i vërtetë për mbrojtësit kundërshtarë.

“Është një futbollist instiktiv, me teknikë të shkëlqyer dhe kupton në mënyrë perfekte lojën. I mjafton një prekje, për të mos humbur ritmin e ndeshjes. Më pas mendon shumë shpejt, është dinamik në duele dhe një goditës i shkëlqyer. Duhet të përmirësohet vetëm në fazën difensive, kur sulmon kundërshtari”, thotë për të Holger Seitz, drejtori i Kampusit të Bajernit të Mynihut.

Shumë e shohin Ibrahimovic si Leon Goreckën e ri, më shumë për rolin në fushë, sesa për cilësitë teknike. Megjithatë ka edhe nga ata, që mendojnë se është pasuesi i Thomas Muller. Gjithsesi, Arijon ka ende kohë për t’u rritur dhe mbi të gjitha në aspektin fizik, pasi është vetëm 1.76 m. Megjithatë, është vetëm 17 vjeç dhe sigurisht që rruga është shumë e gjatë, por vlen të theksohet se të paktën për momentin, është padyshim ajo e duhura. /SS