KURIOZITETE/ Punohet në Milano, ja sekretet e trofeut të Kupës së Botës

20 Nëntor 2022, 14:39, Sport CNA

“Kupa e Botës” nuk simbolizon vetëm “artistët” më të mirë të futbollit global, por edhe kupën më të lakmuar, e ndërtuar me mjaft elegancë deri në detaje. Por ku nderohet, kush e ka krijuar për herë të parë, a është e vërtetë prej ari, si ka evoluar, a marrin fituesit atë origjinalen apo kopjen e saj në palmaresin e tyre, janë disa nga pyetjet e shumta rreth “medaljonit” të futbollit ndërkombëtar, trofeut të Botërorit.

KUSH E KRIJOI? Edhe pse nuk luajnë në kompeticion, italianët sërish janë aty, në një mënyrë a në një tjetër, kjo falë edhe autorësisë së krijuesit, Silvio Gazaniga në vitin 1971, pranë Milanos. Tashmë ajo i përket kompanisë “GDE Bertoni”, e cila është njëkohësisht edhe prodhuesja e kupave të ndryshme dhe medaljeve. Ishte pikërisht kjo periudhë transformuese për të marrë një pamje moderne, ku në krye qëndronte sfera e globit, simbolika e identifikimit “Botëror”.

MODELI I RI 1974 do të rezultonte hera e parë që kjo “mbretëreshë” e kompeticioneve të kishte zot, Gjermaninë Perëndimore, pas suksesit me shifrat 2-1 në folenë e vet “Olimpiastation” ndaj Holandës.

Katari do te jetë vendi organizatori i 13-të i versionit të “Gazaniga”.

Kupa në fjalë është e përbërë nga 18 karat arë, e thënë ndryshe 75% ar. Ajo vjen me dimensione të ndryshme, 36.8 centimetra lartësi dhe me peshë 6.1 kilogramë. Është fakt se versioni origjinal qëndron në “çatinë” e futbollit FIFA.

Çdo katër vjet, punëtorët në fabrikë kanë për detyrë të krijojnë një kopje bronzi të trofeut që i jepet federatës së futbollit për ekipin fitues.

Finalja mundëson që trofeu i “vërtetë” të jetë aty, deri në çastin që emri i përfaqësueses triumafatore gdhendet në të dhe lojtarët e shijojë për pak çaste. Më pas ajo shkon sërish në punishten e saj “GDE Bereton”, me qëllim restaurimin, përpara nisjes për në FIFA, si destinacioni final.

Cilat janë proceset që kalon trofeu deri në prezantimin e finales?

Së pari, trupi prej bronzi formohet në magazinën e dizenjimit të kompanisë “GDE Bereton”. Metali derdhet në një enë të veçantë (që është forma dhe dizajni i Kupës së Botës) për të prodhuar një gips. Pasi të jetë bërë kjo, ajo gdhendet me delikatesë në marrjen e trajtës së plotë, e më pas i hiqet çdo metal të tepërt.

Gdhendja realizohet në mënyrë manuale me një çekiç të vogël për të rafinuar dhe plotësuar detajet e nevojshme mbi trofeun, veçanërisht në dy figurat njerëzore që mbajnë lart botën. Kjo është vetëm një pjesë e punës së kryer.

Ndalesa e radhës është limimi në makineritë e rënda, me misionin e vështirë, perfeksionin në çdo detaj të saj. Trofeu më pas arrin në departamentin e pastrimit me ultratinguj.

Procesi në fjalë shërben si pastrues dhe ngurtësues i efektit të metalit përbërës. Ecuria nuk ndalet me kaq. Hapi i radhës lidhet me zhytje në banjën e “prarimit” (teknikë dekorative për ngjitjen e pluhurit të artë të imët në sipërfaqet e forta të strukturës).

Larja me ujë të distiluar i jep shkëlqim vezullues, e nga më pas spërkatja me llak “Zapon” i siguron ruajtjen e vetive të përftuara nga elementët e mësipërm. Trofeu thahet, pastrohet dhe inspektohet për herë të fundit përpara se të jetë gati për t’u ekspozuar në finalen e “Kupës së Botës”. I gjithë procesi shkencor nga fillimi deri në fund zgjat rreth tre muaj.