web counter
LEXO PA REKLAMA!

SHKARKO APP

App Store
Google Play

Kupa e Amerikës/ Argjentina e nis me fitore, zhgënjen Messi

21 Qershor 2024, 10:44, Sport CNA

Kupa e Amerikës/ Argjentina e nis me fitore, zhgënjen Messi

Argjentina e nisi me fitore, rrugëtimin e saj në Kupën e Amerikës. Kampionët në fuqi të këtij kompeticioni, mposhtën në rezultatin 2-0 Kanadanë në ndeshjen hapëse të turneut.

Pjesa e parë u mbyll me rrjeta të paprekura, ndërsa të dy golat u shënuan në fraksionin e dytë të lojës.

Mundësinë e parë të rrezikshme e kishte Di Maria, në minutën e 9-të, por sulmuesi gaboi i vetëm me portierin.

Pranë golit ishte edhe Kanadaja në minutën e 43-të, por Martinez bëri heroi me një pritje spektakolare, ndërsa Davies, nuk shënoi dot nga topi i kthyer.

Pjesa e dytë e lojës nisi me Argjentinën më kërkuese dhe këmbëngulja u shpërblye në minutën e 49-të.

McAllister, me një asist të shkëlqyer për Alvarez, e nxori sulmuesin të vetëm me portierin dhe ia doli të shënojë golin e parë.

Festë tek argjentinasit, që nuk i ndalën sulmet. Messi kishte mundësinë e artë për të shënuar golin e dytë në minutën e 66-të, por nuk ia doli dot të mposhtë portierin. Gjuajtja e lehtë e “pleshtit”, u largua mbi vijën fatale.

Messi nuk ishte në ditën e tij më të mirë dhe kjo u pa në minutën e 79-të, kur shpërdoroi një tjetër rast flagrant, i vetëm me portierin.

Sfidën e vulosi Lautaro Martinez, dy minuta para fundit të kohës së rregullt. Sulmuesi i Interit shfrytëzoi një pasim të marrë në zonë dhe e ndali topin në fundin e rrjetës.

Argjentina e nis kështu me fitore dhe merr tri pikët e para në Grupin A, aty ku bëjnë pjesë edhe Peruja me Kilin.





Lajmet e fundit nga