E fundit!

23:00 Aktualitet

Zgjedhja e ekipit drejtues të PD-së/ Vijon numërimi i votave në selinë blu

Vijon procesi i numërimit të votave për zgjedhjen e strukt...

Inzaghi: E dimë çfarë përfaqëson Juventus-Inter

15 Shkurt 2025, 19:48, Sport CNA

Interi dhe Juventusi do të përballen mes tyre, në supersfidën e javës së 25-të në Serinë A. Siç ka qenë edhe në të kaluarën, pritet një derbi i zjarrtë dhe shumë i luftuar, ku të dyja ekipet do të kërkojnë me çdo kusht fitoren.

Në prag të kësaj përballje, trajneri i Interit, Simone Inzaghi, vlerësoi maksimalisht kundërshtarin, ndërsa theksoi se të gjithë e dinë rëndësinë e kësaj përballje.

Ai u ndal edhe te gjykimi, por edhe të gjendja e ekipit të tij në prag të përballjes me rivalët e përjetshëm.

"Unë kam vetëm një qëllim: të mbroj punën time, të stafit dhe lojtarëve. Ne e dimë shumë mirë çfarë përfaqëson Juve-Inter për tifozët tanë dhe klubin tonë. Është një ndeshje e rëndësishme në një moment delikat të kampionatit. Do të kemi një ekip të fortë përballë, që është përforcuar nga merkatoja dimërore. Juventusi ka një trajner të shkëlqyer, që e respektoj shumë. Ne duhet të luajmë një ndeshje të shkëlqyer.

Kam ende dyshime, duhet t’i vlerësojmë disa gjëra. Dimarko është rikthyer nga gripi, edhe Damfris është rikthyer nga pezullimi. Duhet vlerësuar ende Turam, i cili ndjen dhimbje. Do të shohim si do të stërvitet. Turam është shumë i rëndësishëm për ne. Momentalisht, mundësia është më shumë që të jetë jashhtë, por ai është shumë i gatshëm dhe ka treguar disponueshmëri pas goditjes që mori në Firence. Nëse do të jetë në gjendje, do të udhëtojë me ne, të tjerët janë mirë.

Ndeshjet direkte janë gjithmonë të rëndësishme, sidomos tani. Duhet ta rrisim nivelin tonë, deri tani në ndeshjet direkte nuk kemi fituar siç do të duhej. Kemi bërë disa ndeshje të mira, përveç atyre me Milan dhe Fiorentinën, që humbëm.

Kam thënë që isha i zemëruar pas ndeshjes me Milanin për gjykimin. Pas disa episodeve mendova për Interin dhe kuptova që kur diçka ndodh për Interin, nuk flitet shumë. Kur ndodhin gjëra kundër nesh, diskutohet gjithmonë. Po, është trajtim jo i duhur, ndaj thjesht doja të mbroja punën time.

Klasifikimi është i dukshëm për të gjithë. Do të përballemi me një skuadër të fortë, e cila është përforcuar në janar dhe ka një trajner të shkëlqyer. Ata kanë pasur disa lëndime, që i kanë penalizuar, por gjithashtu kanë bërë disa barazime, që mund të ishin fitore. Do të jetë një ndeshje shumë e vështirë”, deklaroi Inzaghi.

Ndeshja Juventus-Inter do të luhet ditën e diel, duke nisur nga ora 20:45, në Torino.