web counter
LEXO PA REKLAMA!

SHKARKO APP

App Store
Google Play

Historia emocionuese e Terzic/ Nga lotët e humbjes së titullit kampion, te finalja e Champions-it

8 Maj 2024, 11:40, Sport CNA

Historia emocionuese e Terzic/ Nga lotët e humbjes së titullit

Brenda një viti, trajneri i Borussia Dortmund, Edin Terzic, ka përjetuar emocione të mëdha dhe një histori të denjë për film.

Tekniku verdhezi, vetëm një vit më parë, shfaqej i përlotur, pasi ekipi i tij humbi titullin kampion ndaj Mainc-it.

Kur të gjithë ishin kundër dhe e shihnin si fajtor për disfatën, Terzic kishte në krahun e tij tifozët.

Pavarësisht humbjes së titullit, verdhezinjtë e duartrokitën, duke i dalë në krah. Këtë moment të vështirë, trajneri e ktheu në forcë dhe ua shpërbleu klubit dhe tifozëve në mënyrën më të mirë të mundshme.

Dortmund-i siguroi finalen e Ligës së Kampioneve, pasi eliminoi PSG-në. Sukses i jashtëzakonshëm për gjermanët, ashtu siç e pranoi edhe trajneri.

"Jam shumë krenar për këtë kualifikim. Nuk kam fjalë për të përshkaruar këtë moment. Jam krenar për stafin, lojtarët dhe klubin. Megjithatë, ëndrra nuk ka përfunduar ende. Vuajtëm shumë në këtë përballje, por treguam lojë shumë të mirë ndaj një ekipi që është shumë i rrezikshëm në sulm. E mbajtëm portën të paprekur në dy ndeshje dhe fituam dy gjysmëfinalet. Kjo që bëmë është e jashtëzakonshme dhe e pabesueshme. Ekipi tregoi paraqitje të jashtëzakonshme. Nuk është e lehtë ta mbash portën e paprekur ndaj Parisit", deklaroi ai. 

Padyshim, ky sukses i arritur i takon trajnerit Terzic dhe tifozëve të Dortmund-it. Një dashuri pa kushte, që po jep frytet në fushën e lojës.

Vetë 41-vjeçari vjen nga tribunat e tifozëve dhe e ka ndier si ata këtë arritje. Pas finales, objektivi është i qartë, të fitojnë Ligën e Kampioneve, që do ta mbyllte historinë në mënyrën më të mirë të mundshme.  





Lajmet e fundit nga