E fundit!

07:38 Ekonomi

Eurostat: 35% e shqiptarëve nuk përballojnë qiratë, faturat, pushimet, apo blerjen e rrobave të reja

Shqipëria është vendi me nivelin më të lartë të privimit t...

Fundi i një epoke! Legjenda e Real Madrid-it tërhiqet nga futbolli

6 Shkurt 2025, 14:27, Sport CNA

Marcelo, një nga mbrojtësit më të mëdhenj në historinë e futbollit, ka vendosur t’i japë fund karrierës së tij të lavdishme në moshën 36-vjeçare. Një lojtar ikonë, një lider në fushë dhe një simbol i futbollit të bukur, ka vendosur të varë këpucët në gozhdë pas më shumë se dy dekadash karrierë në nivelet më të larta të futbollit.

Lajmin e largimit nga futbolli e ka konfirmuar vetë Marcelo përmes një videoje emocionuese të postuar në rrjetet sociale. Në mesazhin e tij, ai kujtoi fillimet e tij modeste dhe ëndrrën e realizuar falë mbështetjes së gjyshit të tij.

“Dashuria ime për futbollin vjen nga gjyshi. Ai dëshironte që unë të bëhesha futbollist profesionist dhe bëra gjithçka për ta bërë të mundur. Kur isha 18 vjeç, Real Madrid më kërkoi dhe lëviza në Spanjë. Mund të them se jam një madrilen i vërtetë”, u shpreh ai.

Marcelo e nisi karrierën e tij në akademinë e Fluminense, një nga klubet më të njohura braziliane, duke u dalluar menjëherë si një talent i jashtëzakonshëm në krahun e majtë të mbrojtjes. Lojtari tregoi që herët shpejtësinë, teknikën dhe inteligjencën taktike, të cilat do ta shndërronin në një nga më të mirët e brezit të tij. Në vitin 2007, kur ishte vetëm 18 vjeç, Marcelo iu bashkua Real Madrid, në një lëvizje që do të rezultonte vendimtare për të dhe për klubin spanjoll. Në Madrid, ai nuk ishte vetëm një lojtar, por ai u bë një legjendë.

Marcelo qëndroi në Madrid për plot 15 vite, duke u bërë një nga mbrojtësit më të suksesshëm dhe më të dashur nga tifozët. Ai ishte pasardhësi i madhit Roberto Carlos dhe arriti ta tejkalonte edhe atë në disa aspekte, duke u shndërruar në një simbol të gjeneratës së artë të Los Blancos. Gjatë periudhës së tij te Real Madrid, Marcelo fitoi gjithçka që mund të fitohet në futbollin europian: 6 tituj të La Liga-s, 5 Champions League, 5 Kupa të Botës për Klube, 3 Superkupa të Europës, 2 Kupa të Mbretit (Copa del Rey) dhe 5 Superkupa të Spanjës.

Në total, ai luajti 546 ndeshje me Real Madridin, duke shënuar 38 gola dhe asistuar mbi 100 herë. Stili i tij i lojës, inkursionet në sulm, driblimet e shpejta dhe pasimet precize, e bënë atë një nga mbrojtësit më të mirë në botë. Përveç suksesit në nivel klubesh, Marcelo ishte edhe një pjesë kyçe e kombëtares braziliane. Ai veshi fanellën e Seleção-s 58 herë, duke përfaqësuar Brazilin në disa turne madhorë, përfshirë Kupën e Botës 2014 dhe 2018.

Pas largimit nga Real Madrid në verën e vitit 2022, Marcelo kaloi një periudhë të shkurtër te Olympiacos në Greqi, por pas vetëm 5 muajsh u largua nga klubi. Ai vendosi të rikthehej në shtëpi, duke iu bashkuar Fluminense në vitin 2023, aty ku nisi gjithçka.

Me klubin e tij të fëmijërisë, Marcelo luajti 68 ndeshje për dy sezone, duke dhënë kontributin e tij të fundit si profesionist. Megjithatë, përplasjet me trajnerin Mano Menezes në fundin e vitit të kaluar çuan në largimin e tij nga klubi, duke sinjalizuar edhe fundin e karrierës së tij si futbollist aktiv.