E fundit!

14:03 Politikë

Kur do të votohen në PD Gaz Bardhi dhe Agron Gjekmarkaj?

Dje është zhvilluar mbledhja e dytë e Këshillit Kombëtar, ...

Sfida me Dinamon, Gjoka bën gati debutimet. Dy lojtarë drejt largimit nga Skënderbeu

5 Shkurt 2025, 18:08, Sport CNA

Sfida me Dinamon, Gjoka bën gati debutimet. Dy lojtarë drejt largimit

Skuadra e Skënderbeut po kalon një moment pozitiv pas barazimit në transfertë ndaj Dinamos, një rezultat që ka rritur moralin e ekipit dhe ka dhënë sinjale shprese për të ardhmen. Përveç pikës së marrë, ajo që ka kënaqur trajnerin Ernest Gjoka është qasja e skuadrës në fushë. Një ekip më i organizuar dhe më i disiplinuar taktikisht, i cili tregoi karakter dhe vendosmëri për të mos dalë duarbosh nga ndeshja.

Megjithatë, kampionati është vetëm një pjesë e betejës për Skënderbeun. Kupa e Shqipërisë mbetet një objektiv i rëndësishëm, ku korçarët nuk duan të heqin dorë lehtë. Pas barazimit 1-1 në kampionat, trajneri Gjoka ka filluar përgatitjet për takimin e së enjtes, duke synuar një tjetër paraqitje të mirë ndaj Dinamos, por këtë herë me synimin për të kaluar në fazën tjetër.

Pasi ka analizuar në detaje ndeshjen e fundit, stafi teknik i Skënderbeut ka evidentuar aspektet ku ekipi duhet të përmirësohet. Trajneri Gjoka ka mbledhur lojtarët dhe ka bërë një analizë të thelluar mbi gabimet që u bënë kundër Dinamos, si dhe ka ndarë këshillat për t’i shmangur ato në ndeshjen e Kupës.

Një nga aspektet më pozitive të takimit të fundit ishte përmirësimi i repartit mbrojtës. Pas disa ndeshjeve ku mbrojtja kishte shfaqur pasiguri, më në fund ekipi tregoi stabilitet në prapavijë, duke i dhënë trajnerit më shumë besim në këtë repart. Tekniku bardhekuq ka kërkuar nga lojtarët të ruajnë këtë qetësi në mbrojtje dhe të jenë edhe më pragmatistë në sulm, duke u fokusuar në shfrytëzimin maksimal të rasteve të krijuara.

Në këtë kontekst, duket se formacioni nuk do të pësojë ndryshime të mëdha krahasuar me ndeshjen e kampionatit.

Një tjetër faktor i rëndësishëm për Skënderbeun është ingranimi i lojtarëve të rinj, të cilët janë afruar gjatë merkatos së janarit. Tre nga pesë afrimet e fundit kanë treguar shenja premtuese dhe ka shumë gjasa që disa prej tyre të luajnë titullarë në takimin e Kupës.

Ky është një lajm i mirë për trajnerin Gjoka, veçanërisht në një moment kur disa lojtarë me eksperiencë, si Rashica dhe Rabiu, duken drejt largimit. Situata aktuale i jep mundësinë trajnerit që të eksperimentojë me lojtarët e rinj në mesfushë dhe në sulm, për të parë se sa të gatshëm janë ata për të dhënë kontribut në ndeshje të rëndësishme.

Ndeshja Dinamo-Skënderbeu është planifikuar të luhet ditën e enjte, duke nisur nga ora 17:00.