web counter
LEXO PA REKLAMA!

SHKARKO APP

App Store
Google Play

E fundit!

x

Llogaritë/ Finale mbijetese ndaj Bylisit, Skënderbeu i "dënuar" për fitore në javën e fundit

21 Prill 2025, 20:12, Sport CNA

Llogaritë/ Finale mbijetese ndaj Bylisit, Skënderbeu i

Java e fundit e kampionatit është më e rëndësishmja e sezonit për skuadrën e Skënderbeut.

Një sezon i gjatë, i mbushur me ulje-ngritje dhe vështirësi të shumta, do të mbyllet në mënyrën më dramatike të mundshme, me një ndeshje finale në shtëpi ndaj Bylisit, ku fitorja është e vetmja rrugë për mbijetesë. Çdo rezultat tjetër do të përbënte një goditje të rëndë jo vetëm sportive, por edhe morale për një klub që dikur dominonte futbollin shqiptar.

Aktualisht skuadra korçare ndodhet në zonën “play out”, një pozicion që e lë ende në lojë për të qëndruar në elitë, por vetëm nëse përmbush misionin dhe, në të njëjtën kohë, rezultatet nga fushat e tjera nuk i shkojnë kundër. Realiteti është i thjeshtë dhe i ashpër: Skënderbeu duhet të fitojë ndaj Bylisit. Asnjë skenar tjetër nuk mban gjallë shpresat për të qëndruar në Superiore, për shkak të disavantazhit në përballjet direkte me rivalët kryesorë për mbijetesë, Tiranën dhe Laçin, të cilët ndodhen vetëm dy pikë më poshtë në renditje.

Ky fakt e komplikon edhe më shumë situatën, pasi një barazim nuk do të kishte vlerë për korçarët, nëse dy skuadrat e mësipërme arrijnë të marrin tri pikët në ndeshjet e tyre. Në këtë rast, Skënderbeu do të rrëshqiste përfundimisht në vendin e fundit dhe do të binte një kategori më poshtë.

Nën drejtimin e trajnerit Ernest Gjoka, Skënderbeu ka arritur të rigjejë një farë forme në fazën e katërt të kampionatit, duke regjistruar 12 pikë, më shumë se në çdo fazë tjetër gjatë këtij edicioni. Kjo rritje e vonshme në performancë ka qenë një ogur pozitiv, por ende jo i mjaftueshëm për të siguruar qetësinë. Tani gjithçka varet nga 90 minutat përballë Bylisit, në një stadium që pritet të jetë i mbushur nga tifozët korçarë, të cilët do të jenë aty për të mbështetur skuadrën në një nga ndeshjet më të rëndësishme të viteve të fundit.

Përballë tyre do të jetë Bylisi, që gjithashtu luan për mbijetesën dhe qëndron në vendin e shtatë me vetëm një pikë më shumë. Skuadra ballshiote luan për dy rezultate në këtë transfertë, pasi përveç fitores edhe barazimi do i ndihmonte për të qëndruar mes më të mirëve të futbollit shqiptar.





Lajmet e fundit nga