E fundit!

09:23 Aktualitet

Zbatimi i Aministisë Penale/ Dhjetëra të dënuar lënë burgjet në Korçë

Ka nisur zbatimi i Amnistisë Penale në institucionet e vua...

Dinamos nuk i ndahen dëmtimet, blutë e kryeqytetit janë bërë si ekip… “kristali”

4 Nëntor 2022, 14:56, Sport CNA

Dëmtimet po i bëhen “makth” Dinamos. Të fundit që i janë shtuar listës së gjatë janë Ersil Ymeri, Simon Simoni dhe Erisildo Smaçi.

E megjithatë, kjo gjë i ka shoqëruar që nga nisja e sezonit. Blutë duken si një ekip “kristali”, aq sa nga momenti në moment duket sikur dikush do të lëndohet.

Shpesh faji i vihej terrenit, por tani kryeqytetasit po stërviten në fushë me bar natyral… Ndoshta është thjesht fati i keq, por fakt është se futbollistët janë mjaft delikatë.

INFERMIERIA – Gjithmonë blutë kanë pasur lojtarë në infermieri dhe janë penalizuar jo pak nga ky fakt. Për ndeshjen me Korabin, me dëmtimin e mesfushorëve Ymeri dhe Smaçi, u bënë 7 lojtarët e padisponueshëm.

Rexhinaldo, Lilaj, Vokrri dhe Prodani nuk u grumbulluan fare nga stafi teknik për këtë arsye.

Simoni qëndroi në stol pasi kishte një shqetësim të lehtë, edhe pse mosaktivizimi i tij duket se ka të bëjë më shumë me transferimin e portierit jashtë vendit.

Dëmtimet e Dinamos në fakt kanë nisur që në fazën përgatitore. Në një nga ndeshjet e fundit miqësore u dëmtua në gju Prodani, i cili u detyrua të kryente një ndërhyrje.

Bardhi vinte nga një dëmtim i mbartur nga sezoni i kaluar dhe vetëm tani është i gatshëm për trajnerin. Rexhinaldo ka qenë thuajse gjithë kohën jashtë, ndërsa në javët e para u dëmtuan Lilaj, Imami dhe Marku.

Korçari që mban edhe shiritin e kapitenit, ende nuk është kthyer, kurse mbrojtësi kryeqytetas ishte titullar në Peshkopi.

Mbetet të shihet tani gjendja e Vokrrit, Ymerit dhe Smaçit, por e sigurt është se blutë do të kenë mungesa edhe me Turbinën.

Deri tani, rregullisht në formacion kanë luajtur Dikson, Allmuça, Daja, Danaj, T. Marku dhe Denison.

TURBINA – Pas dy javësh të vështira, ku në ndeshjet me Flamurtarin dhe Korabin morën vetëm 1 pikë, blutë presin këtë javë Turbinën.

Një ndeshje e lehtë në letër, ku Dinamo duhet të fitojë bindshëm për të lënë pas këtë moment delikat.

Trajneri Dede do të ketë në dispozicion mbrojtësin e djathtë Patrik Fetaj, i cili shleu skualifikimin e kartonit të kuq të marrë ndaj Flamurtarit.