14 fitore dhe asnjë humbje, zbulohet trajneri që pritet të zëvendësojë Kolelën te Partizani

6 Qershor 2023, 14:25, Sport CNA

14 fitore dhe asnjë humbje, zbulohet trajneri që pritet të

Xhovani Kolela, i ardhur në drejtimin e Partizanit në gusht të vitit të kaluar, nuk pritet të vazhdojë me Partizanin në sezonin e ardhshëm.

Madje nuk pritet as të jetë në krye të skuadrës në momentin kur lojtarët të mbyllin pushimet dhe të nisin punën për raundin e parë të Champions League. Drejtuesit e klubit nuk janë të bindur për t’i besuar edhe një tjetër sezon italianit dhe pritet të negociojnë me të prishjen e kontratës, e cila skadon pas një viti, për shkak se pas fitimit të titullit, u aktivizua klauzola e rinovimit. Kjo ndarje nuk pritet të jetë aq e lehtë sa me drejtorin Elton Marini, por me siguri edhe në këtë rast do të gjendet një rrugë e mesme, ku të dyja palët të mbeten të kënaqura.

Pas fitimit të titullit, Kolela ishte i bindur për vazhdimin në krye të Partizanit dhe me siguri ka qenë kontrata ajo që i ka dhënë siguri. Gjithsesi, tashmë situata është ndryshe dhe po negociohet për divorcin. Nga ana tjetër, ka nisur puna për gjetjen e trajnerit të ri të të kuqve, ku Kroacia është tregu i zgjedhur.

Tomislav Stipiç është emri kryesor në listën e Partizanit për trajner. Mosha 42-vjeçare mund të tregojë për një trajner pa “CV” të pasur dhe me pak eksperiencë, por në të vërtetë kemi të bëjmë me një alternativë mjaft prestigjioze. Ndikuar nga standardi i këtij trajneri, por edhe nga fakti se ai nuk është i papunë, misioni është i vështirë. Stipiç drejton Rigën në Letoni, ku u emërua në janar dhe ka regjistruar një ecuri të frikshme, pasi numëron vetëm 14 fitore dhe 3 barazime në 17 ndeshje. Nuk dihet jetëgjatësia e kontratës së tij në Letoni, por dihet dëshira e madhe e Partizanit për ta vënë kroatin në drejtim të skuadrës.

14 fitore dhe asnjë humbje, zbulohet trajneri që pritet të

Ajo që premton më shumë është fakti që menaxher i Stipiç është Adrian Aliaj, një njeri shumë i afërt i klubit të kuq. Stipiç u sugjerua edhe vitin e shkuar te Partizani, por në fund ish drejtori Marini nguli këmbë për Kolelën dhe gjithçka u mbyll me italianin. Tani duket momenti i duhur, por mbetet të shihet sesi do të zgjidhet fakti që ai është në detyrë në një klub me mjaft emër si Riga. Stipiç në të shkuarën ka drejtuar edhe ekipe si Grasshopers dhe Slaven Belupo. Mbetet të shihet nëse ai dëshiron të lërë një aventurë të nisur në mënyrë të suksesshme te Riga për të nisur një projekt nga e para te Partizani, që gjithashtu ka pretendime mjaft të mëdha.