E fundit!

16:49 Politikë

Detaje nga mbledhja e demokratëve/ Këshilli Kombëtar i PD-së zgjedh Kryesinë

Këshilli Kombëtar i Partisë Demokratike do të konstituohet...

Pensionistët në Korçë detyrohen të punojnë

4 Shkurt 2025, 13:11, Sociale CNA

Një 78-vjeçar humbi jetën në vendin e punës paraditen e djeshme në qytetin e Korçës. Një ngjarje që ka tronditur pensionistët të cilët përmes mikrofonit të CNA-së, kanë treguar se detyrohen të punojnë për të siguruar disa të ardhura shtesë, edhe pse marrin pension.

Janë vetë pensionistët që tregojnë se kanë vështirësi në jetesën e tyre për shkak të pensioneve të ulëta që nuk u dalin për të siguruar ushqimet, ilaçet dhe nevojat e përditshme.

Por çfarë i detyron pensionistët të punojnë?

Ata shprehen se gjendja e keqe ekonomike dhe pensionet tepër të ulëta, i bën që të kërkojnë një punë në subjekte private për të fituar ca lekë më shumë. Disa prej tyre tregojnë se kanë punuar për disa vite të tjera pas daljes në pension, me punë private ndërsa shprehen se kanë hasur vështirësi por kushtet e jetesës i kanë detyruar ta bëjnë një punë të tillë.

"I detyron gjendja e keqe, ana ekonomike. Me atë pension që marrin nuk janë të kënaqur. Nuk e përballojnë dot jetën, vështirësitë e saj dhe janë detyruar të punojnë në një punë të dytë apo të tretë pavarësisht sëmundjeve që kanë. Po, kam punuar. Shisja tjegulla, tulla. E vështirë është, për moshën tonë."

"Punojmë se marrim pension pak. S'më del. Kam punuar. Kam qenë vinçier. Nuk ishtë e vështirë për aq sa punova se isha mirë me shëndet. Punova dy vjet pas pensioni. S'del, çtë them unë."

"Nuk i del pensioni dhe punojnë. Unë marr 200 mijë. Me vështirësi më del. Ne kërkojmë rritje po kush na i jep. Kam punuar por jo në shtet, në privat. 5 vjet punova në ndërtim. Ndërtimi i vështirë është. Kisha nevojë për lekë prandaj vendosa të punoja."

Pensionistët janë shtresa më e varfër në Shqipëri dhe njerëzit që u mungon vëmendja nga qeveria në çdo aspekt. Pensione të ulëta të cilat nuk plotësojnë dot kushtet e një jetese normale, çka bën që një pjesë e tyre të punojnë në punë private për të fituar të ardhura shtesë./ CNA