Murale edhe në Shkodër/ Bashkëpunim me Ferizajn për punime artistike që përçojnë mesazhe

21 Maj 2025, 15:25, Sociale CNA

Murale edhe në Shkodër/ Bashkëpunim me Ferizajn për punime

“Ndikimi i muraleve në transformimin e qytetit të Ferizajt” është ligjërata që mbajti në Universitetin e Shkodrës “Luigj Gurakuqi”, artistja dhe dekania e Fakultetit të Arteve të Aplikuara në Universitetin e Ferizaj në Kosovë, Lebibe Shabani. Së bashku me Departamentin e Arteve në Shkodër, Shabani tha se prania e saj ka për qëllim nisjen e një bashkëpunimi të përbashkët mes të rinjve në dy shtetet shqiptare.

Murale edhe në Shkodër/ Bashkëpunim me Ferizajn për punime

“Ka muaj që kemi filluar disa iniciativa për të nisur bashkëpunimin fillimisht si dy universitete, pasi unë punoj në Universitetin e Shkencave të Aplikuara në Ferizaj dhe kemi një organizatë artistike ku bëjmë shumë murale dhe kemi dashur të nisim një bashkëpunim mes të rinjve. Shpresoj që ta realizojmë shumë shpejt. Sot kam ardhur të mbaj një ligjëratë në Shkodër lidhur me gjithë punën që ka realizuar organizata artistike ‘Mural Fest Kosova’ dhe pas kësaj ligjërate do të mundësojmë realizimin e një murale brenda këtyre hapësirave”,-tha Shabani.

Muralet në Ferizaj të Kosovës, shprehet artistja Shabani, kanë ndikuar pozitivisht në qytet ndërsa temat e trajtuara janë sociale.

Murale edhe në Shkodër/ Bashkëpunim me Ferizajn për punime

“Muralet në Ferizaj kanë ndikuar pozitivisht dhe kanë bërë një transformim të madh artistik në qytet. Kuptohet se, nga një fasadë e thjeshtë, ngjyra artistike në të dallon dukshëm. E vlerësoj iniciativën që kemi filluar me komunitetin artistik dhe padyshim që kjo punë duhet që të vazhdojë. Arti gjithmonë duhet që të përçojë një mesazh dhe ne jemi të vetëdijshëm në këtë pikë. Në këto 10 vite çdo herë ‘Mural Fest Kosova’ ka trajtuar tema të ndryshme. Stafi i organizatës mblidhet dhe analizon aktualitetin dhe çfarë është e nevojshme në atë moment dhe e vlerëson për një temë të caktuar. Kryesisht temat që trajtohen janë sociale, për të drejtat e njeriut, veçanërisht për të drejtat e grave, por kemi pasur edhe tema të tjera, si mbrojtja e mjedisit. Muralet i kam pikë të dobët dhe kam mbi dy dekada që i realizoj, muralet të cilat janë shumë të rëndësishme sepse janë vepra artistike në hapësira publike dhe përçon mesazh jo te një individ, ose jo te një galeri e mbyllur, por te çdo qytetar që kalon në atë hapësirë. Muralet janë pritur mirë në Ferizaj dhe kjo ka qenë një shtysë shumë e madhe për ne që të vazhdojmë më tej”,-tha Shabani.

Shabani ka zgjedhur Shkodrën, një qytet që ka nisur të aplikojë muralet nga artistë të ndryshëm.

Murale edhe në Shkodër/ Bashkëpunim me Ferizajn për punime

“Shkodra është djep i kulturës dhe ne kemi ardhur këtu për të dhënë dhe për të marrë nga Shkodra. Unë personalisht kam parë murale të bukura dhe shumë të vlefshme, siç është muralja ‘Motra Tone’ në hyrje të Shkodrës. Kemi pasur një partneritet të mirë me Shkodrën, si komunës Ferizaj, si universitet ndërsa unë kam pasur edhe një ekspozitë përpara 4 viteve këtu në Shkodër, kështu që është një binjakëzim shumë i mirë”,-u shpreh Shabani.

Pas kësaj ligjërate, pritet që artistët e rinj në Ferizaj dhe Shkodër të ndërveprojnë dhe të mundësojnë realizimin e muraleve të ndryshme në të dyja këto vende./CNA