Bien temperaturat/ Parashikimi i motit për sot dhe javën

9 Shtator 2024, 07:52, Sociale CNA

Pas një vere “përvëluese” me temperatura të larta, tashmë duket se tabloja meteorologjike ndryshon plotësisht. Kjo për shkak se tashmë mbi vendin tonë pritet depërtimi i njëpasnjëshëm i disa qendrave të thella të presionit të ulët shoqëruar me masa ajrore të lagështa dhe të ftohta.

Depërtimi i këtyre qendrave ciklonare mund të jetë problematike sepse do të sjellin paqëndrueshmëri të menjëhershme (zhvendosja e shpejtë e ajrit të ngrohtë me ajër më të ftohtë) dhe energji potenciale të çliruar në mënyrë të vrullshme.

Kjo do të sjellë mot kryesisht të vranët dhe reshje shiu, të cilat do të jenë me intensitet deri të lartë në formën e rrebesheve dhe stuhive, shoqëruar me shkarkesa të forta elektrike dhe breshër (pa harruar elementin e erës së fortë).

Për ditën e hënë moti parashikohet fillimisht me kthjellime e vranësira në shtim deri të dendura. Deri në orët e mesditës reshje shiu me intensitet të ulët, ndërsa përgjatë Ultësirës Perëndimore, deri mesatar në formën e shtrëngatave. Në orët e vona të mbrëmjes priten reshje shiu me intensitet mesatar në të gjithë territorin, ndërsa përgjatë Ultësirës Perëndimore me intensitet deri të lartë në formën e rrebesheve, shoqëruar me shkarkesa elektrike dhe breshër.

Edhe për ditën e martë moti parashikohet i vranët dhe me reshje shiu, të cilat në orët e para të 24-orëshit deri në orët e mesditës do të jenë me intensitet mesatar e përgjatë Ultësirës Perëndimore lokalisht deri të lartë. Më pas reshjet me intensitet të ulët dhe mesatar.

Për ditën e mërkurë dhe ditën e enjte rikthehen kthjellimet, por edhe alternimet e vranësirave deri të dendura, të cilat do të shoqërohen me reshje shiu me intensitet të ulët dhe lokalisht mesatar në formë shtrëngatash.

Për ditën e premte parashikohet përsëri mot i vranët dhe reshje shiu me intensitet mesatar dhe përgjatë Ultësirës Perëndimore deri të lartë në formë rrebeshesh dhe stuhi.

Duhet theksuar gjithashtu se ditën e hënë dhe atë të premte parashikohet erë intensive nga kuadrati i jugut me shpejtësi deri në 20-22 m/s erë problematike përgjatë vijës bregdetare dhe zonat luginore. Gjithashtu pritet një rënie graduale e temperaturave, por në ditë të caktuara rikthehen në vlerat mbi 30 gradë, kjo për shkak të erës së fortë jugore./ CNA

Bien temperaturat/ Parashikimi i motit për sot dhe javën