“Shëndeti i pari”/ Manastirliu, mesazh në festën e 1 qershorit

1 Qershor 2022, 12:39, Shëndeti CNA

“Shëndeti i pari”/ Manastirliu, mesazh në festën e 1

Ministrja, Ogerta Manastirliu

Ministrja e Shëndetësisë dhe Mbrojtjes Sociale, Ogerta Manastirliu, bashkë me Ministren e Arsimit, Evis Kushi, Ministren e Rinisë dhe Fëmijëve, Bora Muzhaqi, dhe Drejtuesin e UNICEF për Shqipërinë, Dr. Roberto de Bernardi, kanë marrë pjesë në aktivitetin e zhvilluar në kuadër të 1 qershorit, me fëmijë të të gjitha komuniteteve.

Duke uruar të gjithë fëmijët për festën e 1 qershorit, Manastirliu tha se të gjitha institucionet janë bashkë për të siguruar mirërritje, arsimim dhe një të ardhme më të mirë për të gjitha kategoritë e fëmijëve.

“Ne jemi këtu për të bashkuar forcat që e ardhmja juaj të jetë më e mirë. Ne ndoshta me të gjitha këto që po ndodhin nuk do të jemi dot të aftë të parashikojmë çfarë do të ndodhë në të ardhmen, por për një gjë jemi të aftë, jemi të aftë që të përgatisim fëmijët për t’u përballur me të nesërmen. Gëzuar 1 qershorin”, - tha Manastirliu në mesazhin e saj drejtuar fëmijëve.

Teksa falënderoi shkollat dhe stafet mjekësore për angazhimin për dy programet me rëndësi në shëndetin e fëmijëve, atë të shikimit dhe kujdesit oral, Manastirliu tha se këto programe kombëtare në shkolla lehtësojnë edhe prindërit nga kontrollet rutinë që duhet të kryenin për fëmijët e tyre.

“Kemi filluar një program të kujdesit për sytë në shkolla. Kujdesi shëndetësor në shkolla ka filluar të jetë jo vetëm nëpërmjet programeve të vogla, por edhe nëpërmjet programeve kombëtare, ku të gjithë nxënësit në shkolla nga klasa e parë deri në klasën e nëntë të mundet të kontrollojnë shikimin. Gjithashtu kemi edhe një program të kujdesit për dhëmbët sepse aty mësojmë se si të kujdesemi për shëndetin oral, te denstisti i shkollës fëmijët mund të marrin shumë shërbime të nevojshme dhe kështu edhe prindërit lehtësohen nga kontrollet rutinë që duhet t’u nënshtrohen fëmijët e tyre”, -tha Manastirliu.

Ministrja Manastirliu ka vënë theksin te dita e sotme si tepër e rëndësishme për një mjedis të shëndetshëm, nga ku do të nisë të ndalohet me ligj përdorimi i qeseve plastike.

“Sot është një ditë e veçantë se 1 qershori me të vërtetë është dita e fëmijëve, por sot në 1 qershor në bëjmë edhe një hap më shumë për shëndetin e fëmijëve dhe për një botë më të pastër, më të mirë, duke hequr nga përdorimi qeset plastike”, - nënvizoi Manastirliu.

Në aktivitet kanë marrë pjesë edhe Ministrja e Arsimit, Evis Kushi, Ministrja e Rinisë dhe Fëmijëve, Bora Muzhaqi, dhe Drejtuesi i UNICEF për Shqipërinë, Dr. Roberto de Bernardi, të cilët kanë uruar fëmijët për festën e 1 qershorit. Aktiviteti u realizua me organizatat e shoqërisë civile, me synim rritjen e ndërgjegjësimit për mbrojtjen dhe promovimin e të drejtave të fëmijëve./ CNA.al