Zhupa nga Durrësi: Projekti TID, klientelizëm që shkatërron pronën dhe trashëgiminë e qytetit

25 Tetor 2025, 11:32, Aktualitet CNA

Zhupa nga Durrësi: Projekti TID, klientelizëm që shkatërron

Deputetja e Partisë Demokratike, Ina Zhupa, ka denoncuar sot nga Durrësi projektin “TID”, për rijetëzimin dhe rikualifikimin urban të disa zonave të qytetit.

Zhupa e ka cilësuar projektin si korruptiv që sipas saj nuk synon të mbrojë trashëgiminë dhe historinë e Durrësit, por të krijojë hapësira të reja për interesa klienteliste.

Deputetja u shpreh se në zbatim të projektit janë planifikuar të prishen shtëpitë e disa qytetarëve durrsakë të vjetër, për të ndërtuar pallate të reja. Ajo thekson se PD do të kundërshtojë projektin në gjitha format.

Deklarata e plotë e Zhupës:

Ndodhem në qytetin e Durrësit, kam ardhur këtu për të denoncuar projektin e famshëm “TID” për rijetëzimin dhe rikualifikimin urban të disa zonave të Durrësit.

Në fakt, është thjesht një projekt korruptiv dhe klientelist që nuk ka rëndësi për të mbrojtur trashëgiminë apo historinë e Durrësit, por për të krijuar hapësira të reja për interesa klienteliste.
Këtu jemi në një rast tipik në cilin mund të gjykojnë vetë qytetarët që do ta ndjekin.

Kjo është një shtëpi, e cila është e kualifikuar nga projekti TID për t'u shembur. Para këtu ka qenë një tabelë, e cila tregonte se ky mur është një mur otoman i vitit 1500 dhe duhet të mbrohej nga shteti dhe jo të shkatërrohej nga shteti.

Ndërkohë është parashikuar se do të shëmbet dhe vetëm 5 hapa larg ngjitur po ndërtohet një pallat i ri në një zonë, e cila ishte lulishte. Ky pallat po ndërtohet me beton, me pilota në një zonë arkeologjike dhe shumë pranë shkollës së muzikës “Jani Kukuzeli”. Pse ndodh kjo gjë në Durrës?!

Sepse ky projekt i cili është mbushur me pika të kuqe për shtëpi që duhet t'u prishen durrsakëve të vjetër, atyre që janë banorët lokalë të Durrësit, që kanë historinë dhe trashëgiminë e Durrësit edhe në përjetimet dhe kujtesën e tyre, ka vetëm një qëllim, ka si qëllim të krijojë hapësira të reja publike për qëllime klienteliste.

Pse duhet të prishet një shtëpi e vjetër që nga 1500-ta ku zotëria këtu është pronar për t’u ndërtuar një pallat i ri në një vend të një lulishtje ngjitur?!

Nuk ka asnjë arsyetim! Ky projekt i gjithi nuk ka asnjë arsyetim! Dhe ndaj do të kundërshtohet nga ne në të gjitha format, në të gjitha instancat, në gjyqe, në Parlament dhe kudo.

Sepse Durrësi do të duhet të ruhet për trashëgiminë e vet, për historinë dhe për rrëfimet e banorëve lokalë e të mbrohet ajo që është identitet i këtij qyteti dhe jo ndërtimet e reja për qëllime klienteliste. /CNA