Zgjedhjet në Bashkinë e Vlorës/ Kandidatja socialiste: Dredha pjesë shumë e rëndësishme e ekipit

18 Tetor 2025, 22:10, Politikë CNA

Zgjedhjet në Bashkinë e Vlorës/ Kandidatja socialiste: Dredha

Kandidatja e Partisë Socialiste për Bashkinë e Vlorës, Brunilda Mersini ka folur për fushatën e saj.

Mersini në një dalje televizive, ka deklaruar se në ekipin socialist të zgjedhjeve për Bashkinë e Vlorës është dhe ish-kryebashkiaku Ermal Dredha.

Kandidatja socialiste deklaroi se Dredha është një pjesë e rëndësishme e ekipit dhe tha se mandati do të jetë vazhdim i punës së Dredhës.

Më tej, Mersini tha se duhet balancuar planifikimi i qytetit, balancm që do të bazohet në projektet e nisura nga Dredha, kur ky i fundit ishte në krye të bashkisë.

“Zoti Dredha tashmë është pjesë e ekipit dhe një pjesë e shumë rëndësishme, pasi edhe pjesa e mandatit një vjeçar të kryetarit të ardhshëm të bashkisë do të jetë vazhdim i punës së tij dhe pa diskutim kontributi i tij është me shumë vlerë sepse diçka në qytet duhet të ndryshojë. Dhe ajo që unë e mendoj është qëllimi bazik. Unë mendoj se bashkia duhet të jetë efikase, të reagojë në kohë dhe të ketë profesionalizëm. E kam menduar se ka njëlloj parazitizmi në institucionet e bashkisë, në mënyrën si reagon dhe ajo është thembra e Akilit në këtë qytet është pastrimi. Dhe për ta bërë këtë është një element shumë i rëndësishëm burimi njerëzor. Në analizën time dhe informacionet që kam ndarë me zotin Dredha mendoj se duhet ta menaxhojmë qytetin përmes dy pikave të rëndësishme. Pika e parë është zona e bregdetit dhe pjesa tjetër e rëndësishme janë lagjet dhe zonat urbane. Sepse Vlora ka pasur një pabarazi të planifikimit të qytetit, sepse kemi harruar periferinë. Kjo duhet të balancohet në projektet në vazhdim të 2026, projekte që Ermali i ka nisur dhe vijojnë por edhe projekte të tjera që i takojnë kryetarit të ri të bashkisë”, tha Mersini./CNA