Zgjedhjet e 11 majit/ Berisha: Do të fillojë lufta për votën e lirë

28 Maj 2025, 12:55, Politikë CNA

Zgjedhjet e 11 majit/ Berisha: Do të fillojë lufta për votën

Kryetari i Partisë Demokratike, Sali Berisha, ka zhvilluar një konferencë për mediat ditën e sotme, gjatë së cilës tha se zgjedhjet e 11 majit nuk do të pranohen.

Më tej Berisha u shpreh se ka mjaft shqiptarë të dëshpëruar nga vjedhja e votës që janë të gatshëm të luftojnë për lirinë e saj.

Luftë e cila do të fillojë, tha Berisha, i cili u ka bërë thirrje shqiptarëve të durojnë sepse PD do të paraqesë provat që posedon. Kryedemokrati tha se ky regjim duhet të luftohet në çdo skaj.

“Çdo ditë ne do t'ju paraqesim shqiptarë me betimin solemn se kurrë këto zgjedhje nuk do të pranohen. Me besimin e plotë se sot ka shqiptarë të dëshpëruar.

Sot ka shqiptarë të zemëruar. Sot ka shqiptarë të zhgënjyer. Por sot përsëri ka dhjetëra mijëra shqiptarë të gatshëm të luftojnë për votën e lirë.

Dhe kjo luftë do të fillojë. Të mos kujtojë kush kurrë se një kriminel si Edi Rama, një kryehajdut i këtij kombi si Edi Rama, një kryebandit i këtij kombi si Edi Rama, do mund t’u imponojë këto rezultate njerëzve të lirë të Shqipërisë, atyre që i besojnë lirisë. Dhe këto janë fillimi. Edhe njëherë u them shqiptarëve, durim se ne kemi dokumentet. Ne kemi bërë gjithçka për të mbikëqyrur votën tuaj. Ne natyrisht me kallashnikov nuk mbrojmë votën. Por, tani lufta fillon. Ne nuk pranojmë kurrë zgjedhje të tilla. Ne nuk pranojmë kurrë një rezultat të tillë.

Çdo ditë këtu do njiheni. Ka farsë më të turpshme se kjo? Do sjell prapë. Shqiptarët do mësojnë, diaspora do mësojë se çfarë kanë bërë horrat e narkoshtetit me votimin e tyre.

Dhe natyrisht duhet të krijohet një front i përbashkët në Shqipëri dhe diasporë. Ky regjim duhet të luftohet në çdo skaj të këtij vendi dhe në çdo skaj të botës.

Ky regjim poshtëron shqiptarët si një pushtues i egër. Ata që mendojnë se mund t'u imponojnë një farsë të tillë shqiptarëve, gabohen rëndë. Ne jemi këtu për ta dokumentuar atë, por ne do qëndrojmë me çdo çmim për të vërtetën dhe mbrojtjen e saj”, tha Berisha./ CNA