VIDEO/ Servilët e Lulit hedhin valle për Berishën!

28 Dhjetor 2024, 12:06, Aktualitet CNA

Deputetët demokratë duket se kanë përmbyllur angazhimin e tyre politik për vitin 2024 me këng dhe valle. Siç shihet në këto pamje deputetë si Gazment Bardhi, Jorida Tabaku, Agron Gjekmarkaj etj. kërcejnë nën tingujt e këngës së Fatmira Breçanit, kushtuar Sali Berishës.

Nga videoja e publikuar në mediat socilale, demokratët shihen të lumtur në valle, ndërsa sfond dëgjohet teksti i këngës së Breçanit:

“Sot knojn zemrat
Për demokraci
Për doktor Berishën
Dhe shoqninë e tij
Nuk ka fe as s'ka parti
Që përçan këtë shqiptari”

Demokratët thonë se sot fjala përçarje nuk ekziston në fjalorin e tyre dhe se janë më të bashkuar se kurrë, por për ironi kjo këngë të rikujton kohën kur deputetët si Bardhi, Tabaku dhe Gjekmarkaj betoheshin se me Berishën në krye të partisë nuk do të kishte kurrë bashkëpunim dhe se nuk do ta njihnin si kreun e Partisë Demokratike.

“Berisha ka thënë gënjeshtra për ta kthyer PD në mburojë të problemeve të tij personale”. Kështu shprehej Bardhi dy vite më parë për atë që sot e njeh si kryedemokratin që drejton PD-në.

“Nuk ulem në tryezë me Berishën”, thoshte Gjekmarkaj tre vite më parë, pasi sipas tij ish-kryeministri kishte uzurpuar partinë.

“PD nuk ka nevojë për një figurë njishi, ka nevojë për një grup njerëzish.” Thoshte Tabaku një vit më parë duke qenë kundër Berishës si kryetar të forcës më të madhe opozitare.

Mesa duket të gjithë këta deputetë në luftën “e madhe” opozitare që po i bëjnë qeverisë, kanë harruar kryesoren: Të jenë të vërtetë në atë që thonë dhe t’i qëndrojnë bindjes së tyre.

Por në fakt siç mund të shihet në deklaratat e tyre ndër vite, ata që deri dje i serviloseshin Lulzim Bashës, sot po bëjnë të njëjtën gjë me Sali Berishën dhe nesër nuk i dihet se si do të jetë axhenda e tyre politike.

Por një gjë është mëse e sigurt: Nuk mund të jenë alternativë që qytetarit t’i zgjedhin për të drejtuar vendin, për sa kohë ata nuk zgjedhin t’u qëndrojnë deri në fund fjalëve që vetë nxjerrin nga goja./CNA