web counter
LEXO PA REKLAMA!

SHKARKO APP

App Store
Google Play

E fundit!

x

Veliaj vijon “show”-n/ Kërkon meritat e mundësve Valiev dhe Dudaev

12 Gusht 2024, 21:01, Politikë CNA
Veliaj vijon “show”-n/ Kërkon meritat e mundësve Valiev
Kryebashkiaku i Tiranës, Erion Veliaj

Ekipi olimpik shqiptar, që mori pjesë në Olimpiadën e Parisit, u prit këtë të hënë me nderime në aeroportin e Rinasit, pasi mundësit Chermen Valiev dhe Islam Dudaev morën medalje bronzi, të parat për vendin tonë.

Nuk ishte aspak çudi, që në këtë pritje të merrte pjesë edhe kryebashkiaku Erion Veliaj, duke kërkuar kështu të marrë nga fama dhe merita e sportistëve që nderuan Shqipërinë. 

Por ky takim nuk ishte mjaftueshëm për kryebashkiakun. Ai zgjodhi të bëjë një tjetër “show” në tarracën e bashkisë, që më tepër sesa për sportistët ishte për egon e tij personale, për të thënë që Bashkia e Tiranës ka ndihmuar sportistët t’i arrijnë këto rezultate.

Veliaj, ndër të tjera në fjalën e tij, tha se ky takim ishte ceremoni falenderuese për sportistët, të cilët ishin heronjtë e vërtetë të mbrëmjes.

“‘‘Sot nuk mund të na vijë një mesazh më i mirë se sa mesazhi që djersa, talenti, puna, përpjekja, skuadra, shpërblehen. Gëzuar Ditën Nderkombëtare te Rinisë, sidomos të rinjve që aspirojnë që, si këta djem, t’i arrijnë gjërat me punë, me përpjekje, me dashuri, me pasion, si një mision i përbashkët, që është flamuri ynë kombëtar, skuadra jonë, Shqipëria. Gëzuar ditën e rinisë shumë djemve dhe vajzave që janë këtu sot edhe besojnë se vetëm me djersë, me punë dhe me talent ne mund të ecim përpara. Sot është edhe fiks data kur ne kemi çuar aplikimin për Tirana Kryeqyteti Europian i Sportit dhe mbaj mend se si kemi qenë me të njëjtin emocion. Një traditë që po e ndjek Vlora sot, edhe me shpresë, nesër Shkodra. Sporti mund të transformojë realitete ekonomike, realitete politike dhe realitete diplomatike. Sot flamuri i Shqipërisë, falë kësaj përpjekje, falë këtyre copave të këtij pazëlli të një fotografie të madhe të mbledhur ndër vite me përkushtim të jashtëzakonshëm nga Fidel Yllli dhe skuadra e jashtëzakonshme e KOKSHI-t, arriti të ngrejë flamurin tonë dy herë në Paris, me një sukses të paimagjinuar më përpara’’, deklaroi ai.

Pikërisht këtyre heronjëve u la më pak se 3 minuta kohë për të folur (konkretisht presidentit të Federatës Shqiptare të Mundjes, Sahit Prizreni), ndërsa nga pjesa e mbetur e takimit, mbajti fjalim vetë, ku i bëri elozhe “punëve të mira” të bëra në bashki për sportin./ CNA





Lajmet e fundit nga