web counter
LEXO PA REKLAMA!

SHKARKO APP

App Store
Google Play

E fundit!

x

Turi me 4 kandidatë komunash/ Taravari në Pogradec: Thirrjet antishqiptare ishin ngjarje skandaloze

7 Gusht 2025, 17:27, Politikë CNA

Turi me 4 kandidatë komunash/ Taravari në Pogradec: Thirrjet

Kryetari i partisë Aleanca për Shqiptarët në Maqedoninë e Veriut, Arben Taravari, ndodhej sot në qytetin e Pogradecit, së bashku me katër kandidatët për kryetarë komunash, në kuadër të një turi vizitash në juglindje të vendit.

Në fokus të takimit ishin diskutimet për thellimin e bashkëpunimit ndërmjet palëve, veçanërisht në prag të zgjedhjeve lokale në Maqedoninë e Veriut. I pyetur nga gazetarët për ngjarjet e fundit në Shkup, ku tifozë maqedonas përdorën thirrje raciste gjatë ndeshjes së basketbollit Maqedoni–Rumani, Taravari i cilësoi ato si një ngjarje skandaloze, që ka nxitur reagime të shumta në politikën e brendshme.

“Ishte ngjarje skandaloze, të cilën realisht e kemi komentuar të gjithë politikanët në Maqedoninë e Veriut edhe të disa partive politike shqiptare por edhe disa maqedonase. Dua të falenderoj publikisht për solidarizimin që dha Shqipëria edhe Kosova. Ky është një trend muajt e fundit që rritet nacionalizmi maqedonas dhe kjo është edhe arsyeja që Aleanca për Shqiptarët e lëshoi edhe qeverinë pata tre muajsh dhe tani jemi në opozitë dhe po përgatitemi për zgjedhjet lokale”,-tha Taravari.

Ai komentoi gjithashtu deklaratat fyese të kryeministrit maqedonas ndaj shqiptarëve, disa ditë përpara incidentit në Kumanovë, dhe e cilësoi këtë si një reflektim të politikave të brendshme që, sipas tij, ndikohen gjithnjë e më shumë nga ideologjia e “botës serbe”.

“Disa ditë para ngjarjes në ndeshjen e basketbollit në Kumanovë, kryeministri në mënyrë fyese ndaj shqiptarëve fliste në parlament dhe kjo natyrisht reflektohet tek qytetarët. Gjithashtu edhe atë që e tha që qëndron edhe në raportin e BE se bota serbe ka ndërhyrë thellë në Maqedoninë e Veriut dhe këto janë pasoja të funksionimit të inkuadrimit së botës serbe në politikat maqedonase. Shqiptarët e Maqedonisë janë të ndarë në dy blloqe diçka që është e shëndetshme. Janë disa parti por të ndara në dy blloqe çka është më e shëndetshme për një shoqëri”,-tha Taravari.

Nga Pogradeci, Aleanca për Shqiptarët përcjell mesazhin e qartë për intensifikimin e bashkëpunimit rajonal dhe një qasje më të vendosur ndaj çështjeve që prekin drejtpërdrejt shqiptarët në Maqedoninë e Veriut. Në prag të zgjedhjeve lokale, forca politike e drejtuar nga Arben Taravari synon të mobilizojë mbështetjen e qytetarëve për një alternativë opozitare, duke e vendosur në qendër të debatit politik dinjitetin dhe përfaqësimin e barabartë./CNA





Lajmet e fundit nga