web counter
LEXO PA REKLAMA!

SHKARKO APP

App Store
Google Play

E fundit!

x

Standardi i dyfishtë i Ramës

26 Shkurt 2025, 14:55, Politikë CNA
Standardi i dyfishtë i Ramës
Edi Rama

Që prej 10 shkurtit, pas arrestimit të kryebashkiakut Erion Veliaj, qëndrimet e Ramës ndaj drejtësisë kanë ndryshuar.

Kryeministri i cili dikur nuk pranonte kurrsesi të komentonte vendimet e drejtësisë duke thënë se është e pavarur dhe se politika i ka hequr duart prej saj është e lirë të bëjë punën e saj e pavarur, nisi sulme të ashpra ndaj prokurorit dhe gjyqtarit të çështjes së Erion Veliajt.

“Kamikazë, ekstremistë të djathtë, ndikohen nga llumi i kënetës” janë deklaratat më të shpeshta të kryeministrit Edi Rama përgjatë këtyre javëve që nga çuarja pas hekurave e kryebashkiakut Erion Veliaj me dy akuza të rënda si korrupsion dhe pastrim i produkteve penale, vepra penale për të cilat rrezikon deri në 15 vite burg.

Kryeministri Edi Rama po vepron me dy standarde. Kryeministri ynë nuk ka pasur të njëjtin qëndrim ndaj SPAK-ut ku kreu i PD-së Sali Berisha u la në arrest shtëpie. As për arrestimin e ish-Presidentit Ilir Meta, madje as për Ahmetajn apo zyrtarët e tjerë socialistë që përfunduan në burg.

Gozhda në sharrë i mbeti tek arrestimi i Veliajt. Në këtë moment kryeministri vendosi të thyente çdo standard dhe nisi një breshëri sulmesh ndaj prokurorëve dhe gjyqtarëve, me një gjuhë intimiduese që u kritikua gjerësisht nga BE apo institucionet e tjera të drejtësisë dhe përsëri deklaroi se nuk heq asnjë presje nga ato që kishte thënë.

Rama quan vendim pa gjyq arrestimin e Veliajt, ndërkohë që për këtë të fundit ka dy vendime. 24 masat e sigurisë për pedagogët e UBT i quan pa gjyq, ndërsa të njëjtin standard nuk e ka ruajtuar për Berishën, Metën, Ahmetajn, apo të tjerë. Për 24 masat që flet vetëm disa janë me burg dhe e vërteta është që hetimin e ka bërë Policia e Shtetit dhe është ajo që e ka referuar në SPAK.

Edi Rama e ka bërë tashmë të rrugës të luajë rolin e mbrojtësit dhe sulmuesit ndaj SPAK-ut, prokurorëve dhe gjyqtarëve.

Rama ka treguar dy fytyrat e tij në lidhje me drejtësinë e re, duke u rreshtuar në të njëjtën linjë si Berisha dhe Meta, që e sulmojnë kur godet ata dhe e mbrojnë kur godet kundërshtarin.

Të njëjtin front ka dhe Kryeministri Rama në këtë periudhë, pasi duket se është “çmendur” pas arrestimit të Erion Veliajt dhe sulmon prokurorin dhe gjyqtarët që tashmë i konsideron si “kundërshtarët” e tij./ CNA





Lajmet e fundit nga