web counter
LEXO PA REKLAMA!

SHKARKO APP

App Store
Google Play

E fundit!

x

Rama, si Ahmetaj: Drejtësi Jakobine

26 Shkurt 2025, 13:44, Politikë CNA

Rama, si Ahmetaj: Drejtësi Jakobine

Kryeministri Edi Rama sot ka folur me gjuhën e ish krahut të tij të djathtë, ish-zëvendëskryeministrit Arben Ahmetaj, i shpallur në kërkim nga drejtësia.

Pas bërjes publike të akuzave ndaj tij Ahmetaj e quajti një bashkëpunim të politikës, mediave të inceneratorëve dhe SPAK, madje deklaronte se kemi një drejtësi Jakobine.

Sipas Ahmetajt SPAK po e hetonte me urdhër të Ramës, duke pretenduar se drejtësia kontrollohej nga Rama.

Me të njëjtat shprehje si të Ahmetajt ka folur sot Rama. Ai tha se “drejtësia i ka sytë me gjak” dhe “këtë lloj drejtësie jakobine mazhoranca nuk do ta pranojë”

“Kjo metodë që po kthehet në sistem është gabim. Këto paraburgimet me një të rënë të lapsit, nëse s’ka prova, nuk i pranoj. E kemi parë këtë film në kohëra të tjera. Kjo është fryma e shqiptarëve që e duan Shqipërinë vetëm për vete dhe kur nuk e kanë për vete, janë gati ta shesin në çdo pazar të Europës. Barra e provës i takon akuzuesit, jo të akuzuarit.

Drejtësia është shpatë për të gjykuar, peshore për të qenë të saktë dhe sytë e verbër për të qenë tërësisht të pavarur. Kështu është Lady of Justice. Ky imazh po të skulpturohej përpara reformës në drejtësi, do ishte Lady of Justice e shtrirë, bufi i kënetës me zhapiqe, zhaba, brektosa, insekte, vemje, krimba mbi të, duke i ngrënë rropullitë. Kështu do ishte skulptura para reformës në drejtësi. Këtë zonjën në këmbë e ngriti PS.

Zonja sot i ka sytë me gjak, jo të mbyllur. Pikërisht se i ka sytë me gjak, ne kemi dëgjuar gjykatës specialë, që thonë se populli kërkon dënim më të madh për X ose Y sepse populli ka mosbesim. Ky është fundi, kjo është gjuha e Putinit dhe jo e Europës. Për ne SPAK dhe GJKKO rrojnë 1 mijë vjet, por të mos sillen si redaksi gazetash” – tha Rama.

Tani të na tregojnë Ahmetaj dhe Rama se kush e kontrollon SPAK-un?

Se Ahmetaj thotë Rama, Berisha thotë Rama, Rama dhe Veliaj thonë Berisha, Ilir Meta thotë narkoshteti, ndërkohë përveç Ramës secili prej këtyre politikanëve e ka provuar shpatën e drejtësisë.

Ahmetaj është në kërkim, Berisha është në detyrim me paraqitje, Ilir Meta në arrest me burg, Veliaj në arrest me burg. Cila është drejtësia Jakobine për të cilin flasin Rama dhe Ahmetaj?

Ajo që godet pa parë majtas apo djathtas dhe që po i jep fund epokës së paprekshmërisë, që është institucioni më i besueshëm nga shqiptarët, apo ajo që po lufton korrupsionin dhe krimin e organizuar?/CNA





Lajmet e fundit nga