E fundit!

20:00 Politikë

Mbyllen negociatat për tre kapituj/ Rama në Bruksel: Gur kilometrik në rrugëtimin e Shqipërisë drejt BE-së

Ditën e sotme në Këshillin Europian, Shqipëria ka mbyllur ...

SPAK, masë për Berishën pa pyetur Kuvendin/ Konstitucionalisti Ramaj për CNA: Prokuroria shkeli nenin 73 të Kushtetutës

23 Tetor 2023, 11:50, Politikë CNA

SPAK, masë për Berishën pa pyetur Kuvendin/ Konstitucionalisti

Sali Berisha

Prokuroria e Posaçme kundër Korrupsionit dhe Krimit të Organizuar ka kërkuar ndaj ish-kryeministrit Sali Berisha, masën “detyrim paraqitje” dhe i ka ndaluar atij të largohet nga vendi, kjo për shkak të rezultatit të hetimeve që lidhen me dosjen e privatizimit të ish-kompleksit "Partizani".

Veprimi i SPAK-ut është konsideruar antikushtetues nga Berisha, por edhe nga eksponentë të tjerë të PD-së, të cilët kanë hedhur akuza se kjo lëvizje është e motivuar politikisht nga vetë kryeministri Rama.

Për ekspertët e ligjit, ndaj deputetëve të cilët gëzojnë imunitet, drejtësia nuk mund të marrë asnjë masë, pa firmat e ligjvënësve të Këshillit për Rregulloren, Mandatet dhe Imunitetin.

Në një prononcim për City News Albania TV, konstitucionalisti Redi Ramaj, referuar rastit të ish-kryeminstrit Berisha thotë se është shkelur neni 73 i Kushtetutës:

“Veprimi i SPAK-ut bie ndesh me nenin 73 të Kushtetutës, ku deputetit nuk mund t’i kufizohet liria në çdo lloj forme, pa autorizimin e Kuvendit. Prokuroria e Posaçme duhet që kërkesën ta depozitonte në Kuvend për masë sigurimi për Berishën dhe jo në gjykatë", thotë Ramaj ndër të tjera për CNA.

Por çfarë përmban neni 73 i Kushtetutës, të cilin Ramaj citon.

Konkretisht në nenin 72 të Kushtetutës, në pikat 2, 3 dhe 4 thuhet se:
2. Deputeti nuk mund të arrestohet ose t’i hiqet liria në çfarëdo lloj forme apo ndaj tij të ushtrohet kontroll personal ose i banesës, pa autorizimin e Kuvendit.
3. Deputeti mund të ndalohet ose të arrestohet pa autorizim kur kapet në kryerje e sipër ose menjëherë pas kryerjes së një krimi të rëndë. Prokurori i Përgjithshëm ose Drejtuesi i Prokurorisë së Posaçme njofton menjëherë Kuvendin, i cili, kur konstaton se nuk ka vend për procedim, vendos për heqjen e masës.
4. Për çështjet e parashikuara në paragrafët 2 dhe 3 të këtij neni, Kuvendi mund të diskutojë në seancë me dyer të mbyllura, për arsye të mbrojtjes së të dhënave. Vendimi merret me votim të hapur.

Pra, në këtë rast nga SPAK nuk janë ndjekur rregullat konform ligjit, për një individ, që pavarësisht akuzave që mund të rëndojnë ndaj tij, ai sërish gëzon mandatin e deputetit të Shqipërisë.

Ndërkaq, këtë të hënë në GJKKO mbahet seanca ku do të njihen me masën e sigurisë Jamarbër Malltezi dhe ndërtuesi Fatmir Bektashi, por nuk do të ketë një komunikim mase për Berishën, edhe pse SPAK kërkoi ndaj ish-kryeministrit të njëjtën masë si ndaj Bektashit, pra “detyrim paraqitje”.

Për këtë fakt CNA pyeti Ramajn se si shpjegohet nga ana juridike ky diferencim, pasi Bektashi dhe Berisha po gjykohen në të njëjtën dosje, atë të privatizimit të ish- kompleksit Partizani. Konstitucionalisti theksoi se edhe në këtë rast nuk është ndjekur procedura e duhur.

“Masat e sigurimit verifikohen njëkohësisht për të gjithë të hetuarit në një çështje. Vetëm kur gjykata ka vështirësi për shkak të numrit të madh të të pandehurve mund t’i shpërdajë në disa ditë të ndryshme. Por, nuk është ky rasti.” shtoi Ramaj për CNA.

Kujtojmë se ndaj ish-kryeministrit Berisha rëndon akuza e “korrupsionit pasiv”. SPAK pretendon se Berisha, në cilësinë e tij si Kryeministër, ka favorizuar procedurat e privatizimit të ish-kompleksit "Partizani" dhe përfitues i drejtpërdrejtë ka qenë Malltezi.

Në tokën e ish-kompleksit "Partizani", Malltezi në cilësinë e investitorit nga shoqëria “Homeplan” sh.p.k., ka kryer ndërtime dhe përfitimet llogariten në shumën 672 miliardë lekë./CNA