web counter
LEXO PA REKLAMA!

SHKARKO APP

App Store
Google Play

E fundit!

x

Skandalet e njëpasnjëshme/ Rama: Kemi qenë ibret, tani jemi të parët në integritetin e prokurimeve

25 Shkurt 2025, 18:42, Politikë CNA

Skandalet e njëpasnjëshme/ Rama: Kemi qenë ibret, tani jemi

Kryeministri Edi Rama në një takim me asambletë socialiste në kryeqytet ka folur dhe për korrupsionin. Pak orë pasi SPAK zbarkoi në UBT për aferat me tenderat, Rama tha se kjo është një nga kategoritë më të prekura nga korrupsioni. Megjithatë tha Rama, sipas BE, vendi ynë është i pari në rajon për integritetin e tenderave me 80 pikë.

“Bashkimi Europian nuk bën dhurata dhe nuk bën politikë në këtë proces, por bën vetëm hesape. Pastaj vjen politika. Politika, madje që të jem i saktë, përdoret për të penguar, jo për të nxitur dhe afruar. Kur ti i ke bërë detyrat dhe atyre nuk i vjen përshtat sepse kanë ca halle të tjera, thonë jo se si ke bërë mirë, edhe të lënë aty të presësh, siç na lanë ne nja tre vjet që të kapërcenim nga kandidati në negociata, po politikë që të thotë “s'ka problem se nuk e ke bërë këtë, por ne na duhesh dhe do të afrojmë”, kjo nuk ekziston. Nuk ekziston. Të ishte se do ekzistonte, do kishin afruar Ukrainën.

S'është Ukraina më afër se sa ne. Pse jemi ne më afër? Sepse kemi bërë detyrat dhe e dini pse sot flitet për korrupsionin më shumë sesa ç'flitej më parë? Jo se ka më shumë korrupsion, por sepse është e provuar, e studiuar, e analizuar, e shkruar, që kur një vend dhe një shoqëri angazhohen fort në luftën kundër korrupsionit, ndodhin dy gjëra përpara se sa të kapërcehet kjo fazë. E para, rritet perceptimi i korrupsionit se flitet më shumë për korrupsionin dhe dyta rezultatet, objektivat që arrihen mbulohen nga një zhurmë shumë e madhe dhe nga një thashethemnajë shumë e madhe, që është ajo që ne jetojmë sot, dhe këto nuk i them unë. Janë të studiuara, të shkruara, të analizuara. Tani, nëse ka korrupsion, ku ka korrupsion? Korrupsion ka në garat për fondet, tenderat apo jo? Ajo është një nga zonat më të prekura nga korrupsioni, sepse bëhet fjalë për shpërndarjen e parave", tha Rama.

 

 

Rama gjtihashtu tha se jemi më afër BE duke qenë se burokracitë në vend janë pakësuar.

"Sot - nuk e themi ne këtë, po e thotë Bashkimi Europian, përmes strukturës së vet, që merret me analizën faktike, jo me gazetat dhe me portalet dhe me kanalet, - Shqipëria është e para në klasifikimin e integritetit të prokurimeve publike në rajon dhe është me diferencë. Ne jemi 80 pikë, vendi i dytë është 71 pikë, 71 pikë, që është Mali i Zi, që është bashkë me ne, më afër derës së anëtarësimit. Pastaj vijnë të tjerë. Ne jemi të parë në prokurimet publike.

Nuk kemi qenë në këtë pozicion, kemi qenë ibret. Sot jemi të parët. Ku është tjetër? Është tek të gjitha ato radha e histori që për një certifikatë paguheshin lekë përpara se shkohej aty tek kopshti, te njësia pesë. Një tmerr i madh, “jo kam letër, jo s'kam letër”. Hajde, nesër”, “jo s’punon printeri, s'kam bojën e printerit” radhë e gjatë, për të marrë një dokument që ti ekziston. Të gjitha këto nuk ekzistojnë më. E dini se janë 47 milionë të llogaritura, 47 milionë kontakte për të marrë një dokument me e-Albania, që tani merret edhe nga brenda dhe nga jashtë. Tani ata që janë jashtë në diasporë, nuk ka nevojë fare të vijnë në Shqipëri për të bërë letra të caktuara. I bëjnë me telefon edhe nga Australia. 47 milionë kontakte që më parë ishin, “jo më jep ndonjë gjë, jo të jap ndonjë gjë, jo prit, jo hajde, jo fut mik”, por natyrisht që unë nuk e kam se si ta mohoj që të kemi akoma një problem jo të vogël me hipotekën", u shpreh Rama./ CNA





Lajmet e fundit nga