web counter
LEXO PA REKLAMA!

SHKARKO APP

App Store
Google Play

E fundit!

x

Sulmet e Veliajt ndaj Dados/ KLP reagon pas interesimit të CNA-së: Mbështesim prokurorin

25 Shkurt 2025, 11:50, Politikë CNA

Sulmet e Veliajt ndaj Dados/ KLP reagon pas interesimit të CNA-së:

Këshilli i Lartë i Prokurorisë ka thyer heshtjen pas interesimit të CNA-së për një reagim për sulmet e vazhdueshme të kryeminstrit Edi Rama dhe kryebashkiakut Erion Veliaj ndaj prokurorit Ols Dado dhe gjyqtarit Erion Bani.

KLP dënon sulmet dhe presionin ndaj prokurorëve të SPAK-ut dhe në veçanti ndaj prokurorit Ols Dado.

KLP bën thirrje që çdo pretendim, akuzë apo ankesë ndaj një prokurori, të trajtohet në përputhje me ligjin dhe brenda kuadrit institucional.

“Këshilli i Lartë i Prokurorisë (KLP) shpreh shqetësimin për fushatën e vazhdueshme të sulmeve, etiketimeve denigruese dhe përpjekjeve për presion ndaj prokurorëve të SPAK-ut në përgjithësi dhe në veçanti ndaj prokurorit të Prokurorisë së Posaçme Olsi Dado. Deklarata të artikuluara jo vetëm nga disa segmente të caktuara mediatike, por edhe nga persona të përfshirë në hetime ose të akuzuar prej tyre, përfshirë zyrtarë të lartë, dëmtojnë integritetin dhe besimin në drejtësinë shqiptare. Sulmet verbale cenojnë procesin e drejtë hetimor dhe gjyqësor, si garanci themelore të shtetit të së drejtës.

KLP bën thirrje që çdo pretendim, akuzë apo ankesë ndaj një prokurori, të trajtohet në përputhje me ligjin dhe brenda kuadrit institucional. KLP rithekson rëndësinë e respektimit të standardeve etike të raportimit nga mediat, duke siguruar paanshmërinë në informimin e opinionit publik, për të shmangur çdo formë dezinformimi që mund të ndikojë në integritetin e proceseve gjyqësore. Në respekt të një sistemi të pavarur gjyqësor, bëjmë thirrje për të treguar durim dhe maturi. Çdo përpjekje për të ndikuar përmes presioneve publike apo debatit politik minon parimet e demokracisë.

Këshilli i Lartë i Prokurorisë qëndron në mbështetje të prokurorit Olsi Dado dhe të gjithë prokurorëve të Republikës së Shqipërisë, që ata të ushtrojnë funksionin e tyre në përputhje me ligjin, si e vetmja garanci që drejtësia të funksionojë mbi bazën e fakteve, provave dhe procesit të drejtë ligjor”, thuhet në reagimin e KLP-së.

Një ditë më herët, CNA kontaktoi kryetaren e KLP-së, Mirela Bogani, lidhur me komentet linçuese të Veliajt ndaj prokurorit Dado. Bogdani tha se nuk mund të përgjigjej për veten, pasi janë organ kolegjial, por theksoi se do të mblidhej Këshilli i Lartë i Prokurorisë për të vendosur se si do të reagohej ndaj sulmeve të Veliajt.

“Unë nuk të përgjigjem dot vetëm për veten time, sepse ne jemi organ kolegjial. Nëse e shikoni, kemi dalë javës që shkoi me dy deklarata për shtyp. Do ta vendosim, nëse do të reagojmë apo jo (për këtë rast). Sapo ta ndajmë, do merrni një njoftim, si çdo herë", -tha për CNA-në, Mirela Bogdani./ CNA





Lajmet e fundit nga