“Është sfiduese të jesh gruaja e një kryeministri”/ Linda Rama: I jap vetë makinës, gatuaj dhe nuk kam dado

17 Maj 2025, 21:34, Politikë CNA

“Është sfiduese të jesh gruaja e një

Bashkëshortja e kryeministrit Edi Rama, Linda Rama dha sot një intervistë gjatë Forumit Ndërkombëtar Future Investment Initiative që u mbajt paraditën e kësaj të shtune në Tiranë. Gjatë intervistës, Linda Rama u ndal te jeta e saj në këto 12 vite, kohë kur i shoqi mban detyrën.

Në fillim, Rama tha se në aspektin profesional ka vendosur t’i përkushtohet politikave publike dhe çështjeve të zhvillimit.

“Të jesh pranë Edit këto 12 vjet, ka qenë një mundësi e shkëlqyer për të kontribuar nga ana ime, në një moment historik dhe mjaft të rëndësishëm për vendin tim, Shqipërinë. Në fakt, sa i takon profilit e gjithë jeta ime është shpenzuar në politikat publike dhe çështjet e zhvillimit dhe kam qenë si rrjedhojë shumë e ndjeshme ndaj grupeve vulnerabël dhe kam qenë një avokate e të drejtave të grave dhe të drejtave të njeriut”,-tha Rama.

Më tej, u shpreh se pas marrjes së detyrës, zgjodhi të shtonte një tjetër dimension veç profilit profesional.

“Në një moment të caktuar në kohë përfundova të isha dikush që ishte aktiviste për të drejtat e njeriut dhe politikat publike në të njëjtën çati me personin, të cilit i ishte besuar drejtimi i politikave publike dhe ndryshimit të jetës së njerëzve dhe ishte sfidë për të dy ne. Kuptova pastaj qysh në fillim që sapo bëhesh bashkëshortja e dikujt që zgjidhet, rreziku është që menjëherë pas kësaj njerëzit të shohin vetëm si bashkëshorten e kryeministrit. Në fillim mendova që thjeshtë do t’i shtoja një dimension tjetër profilit tim profesional, por e kuptova më pas që më duhej të ruaja identitetin tim profesional dhe persona”,-tha Rama.

Rama tha se roli i saj është sfidues sepse duhet tejkaluar skepitcizmi, teksa shtoi se i jep vetë makinës, nuk ka një dado për fëmijën dhe gatuan vetë.

“Ishte shumë sfiduese. Së pari, ishte shumë e vështirë të tejkaloje skepticizmin e njerëzve. I thosha gjithkujt që unë do vazhdoj të jem i njëjti person si më parë dhe do të punoj në të njëjtën fushë si më parë, por ishte shumë e vështirë për ta, që ta besonin. Në fakt, unë i jepja vetë makinës, nuk kam një dado për fëmijën tim, unë gatuaj vetë dhe në fakt për njerëzit ishte shumë e vështirë, nuk e lidhnin dot këtë lloj narrative me bashkëshortin e dikujt kaq të rëndësishëm”,-u shpreh Rama./CNA