web counter
LEXO PA REKLAMA!

SHKARKO APP

App Store
Google Play

E fundit!

x

Shifrat sipas EUROSTAT/ Berisha: Rama po shpopullon vendin, vrau shpresën

28 Korrik 2022, 19:51, Politikë CNA
Shifrat sipas EUROSTAT/ Berisha: Rama po shpopullon vendin, vrau shpresën
Kryetari i PD Sali Berisha

Kryetari i PD-së, Sali Berisha, ka zhvilluar në Mirditë një bashkëbisedim me personalitete të fushave të ndryshme, ku do të diskutohet shpopullimi i vendit.

“EUROSTAT thotë se nga Shqipëria janë larguar 744 417 qytetarë. Largime të mëdha të tilla ndodhin në luftëra civile. Por edhe në luftëra civile kaq shumë nuk largohen. Ikën njëra palë, ajo që humbet, por kaq nuk janë larguar. 744 417 qytetarë janë 26% e shifrës së 2011. Pse ikin shqiptarët? Pas liberalizimit të vizave, gjer në largimin e qeverisë nga pushteti, në Gjermani kanë kërkuar azil gjithsej 413 shqiptarë. Sipas shifrave të INSTAT që kontrollohet nga Edi Rama, nga viti 2007-2014 popullata në Shqipëri është rritur, më pas fillon rënia. Pse u rrit? Sepse vendi u bë me shpresë. U vu në epiqendër qytetari. Dyfishuam rrogat. Infermierja merrte 130 mijë lekë, shkoi mbi 300 mijë lekë. Mësuesi po ashtu. Pensionet e fshatit ishin 34 mijë lekë të vjetra, i dyfishuam. Ishim të vendosur t’i rrisnim progresivisht ato. Arritëm të kishim rroga më të larta se vendet e rajonit, përfshirë edhe Bullgarinë e Rumaninë.

Kjo politikë i ka shtyrë shqiptarët të largohen nga Shqipëria. Nëse ti shkon dhe i varfëron, i nënçmon ata, dhe ua vështirëson jetën e përditshme, perspektivën, ata thonë; të ikim diku, për një jetë më të mirë. Qëndrimi më shkatërrimtar për shpresën e shqiptarëve, është qëndrimi ndaj votës. Ne demokracinë e bazuar në votë kemi për ta mësuar, nuk jemi një traditë vote, atë po e zhvillonim. Çfarë bëri? Ky njeri që mori pushtetin nga zgjedhjet. Ky njeri që gjatë gjithë kohës që ishte në pushtet nuk arriti kurrë të faktonte se i kanë prekur një votë, pavarësisht nga zhurma që bënte, tani thotë: Këta nuk do votojnë. Ua tregoj unë këtyre! Sigurisht një kryeministër që vendos që qytetarët të votojnë formalisht, nuk ka vështirësi për ta realizuar këtë. Ngriti sistemin e patronazhistëve, sistemin e bandave, sistemin e blerjes së votës. Nëse kanë ikur kaq shumë, faktor është mungesa e shpresës se mund të ndryshojë pushteti, Shqipëria mund të bëhet, mund të ecë. Më së fundi përfundoi duke i hequr votën PS-së. Kjo është gjëmë e madhe. Jua them unë, duhet ta bisedoni me çdo socialist. Historia ka provuar se njerëzit të cilët nuk e konsiderojnë të shenjtë votën e lirë, nuk respektojnë lirinë e tjetrit, ata bëhen ndër më të rrezikshmit, çdo gjë. Të heqësh sot votën nga një parti më kryesore në vend, e kthen atë në kohën e Enver Hoxhës. Dolën emrat, 54 emra që të gjithë të emëruar si në kohën e Enver Hoxhës, nga Byroja dhe Edi Rama. Ata janë të rrezikshëm për shoqërinë, ai është një kontingjent që vepron si kope dhe ne dimë më mirë se të tjerët se çdo të thotë t’ia delegosh arsyen, ndërgjegjen tjetrit. Ne e kemi provuar njëherë atë në diktaturë. Është katastrofa më e madhe njerëzore. Të rinjtë nuk e pranojnë, të rinjtë kjo i dëshpëron. 80% e atyre që janë larguar janë nën moshën 35 vjeç. Ne po bëhemi komb pa të ardhme, pa rini. Rrisim fëmijë, të rinj për të emigruar. Ka një rënie katastrofale të nxënësve, të krahut të punës. Shqipëria po shkatërrohet, është në rrezik të madh real. Këtu jemi në një kompleks kjo është njëra anë, shpopullimi”, tha Berisha./CNA.al





Lajmet e fundit nga