web counter
LEXO PA REKLAMA!

SHKARKO APP

App Store
Google Play

Shkarkimi i Veliajt/ Teliti: PS po e vonon qëllimisht

17 Shtator 2025, 10:34, Politikë CNA

Shkarkimi i Veliajt/ Teliti: PS po e vonon qëllimisht

Nënkryetari i Këshillit Bashkiak të Tiranës, Dorian Teliti, ka deklaruar se Partia Socialiste po e vonon qëlllimisht shkarkimin e Erion Veliajt.

Ndonëse kryeministri Edi Rama e shkarkoi politikisht Veliajn duke vendosur Manastirliun si kandidate për garën, ndonëse i kërkoi Këshillit Bashkiak të mblidhej për procedurat, ende nuk ka pasur një mbledhje për këtë dhe sipas Telitit kjo po bëhet qëllimisht.

“Është ditë e vonuar. Ditë e vonuar sepse ne kemi kërkuar për shkarkimin e Veliajt...dhe s’duhet ta merrte Erion Veliaj mandatin, sepse e dimë shumë mirë si e mori në 2023-shin. Por e mori si e mori me ‘5D’, do ta ‘vishte’ me shokët e vet me para, me të fortë, e kështu me radhë. Juridikisht ishte kryetar i bashkisë. Momentin që ai u arrestua në shkurt të këtij viti, në një vend demokratik që aspiron për t’u integruar në vendet e Bashkimit Europian, një kryetar bashkie jep dorëheqjen.

Por megjithatë pritëm 3 muaj, aq sa thotë ligji, që mund ta zëvendësojë njëri prej zëvendësve të vet. Dhe në maj, grupi i PD-së, këshilltarët e PD-së, dorëzuam kërkesën tonë që të mblidhej urgjent Këshilli Bashkiak, për të trajtuar situatën juridike të kryetarit të bashkisë, dhe automatikisht kalon edhe në shkarkimin e tij. Kërkesë që nuk u trajtua kurrë nga Këshilli Bashkiak, mohohej madje. Asnjëherë nuk u fut në rend dite, deri javën e kaluar që ‘i madhi’ u dha urdhër këshilltarëve të vet të PS-së, që të mblidheshin urgjent e për të bërë pikërisht atë që ka kërkuar opozita që 4 muaj më parë.

Gjithsesi, po kalojnë ditët dhe ne nuk po mblidhemi. Edhe urdhri i të madhit, nuk po shkon deri diku. Çfarë po ndodh brenda grupit të këshilltarëve të Partisë Socialiste?

Tashmë kanë edhe kandidatin. Ata kanë filluar fushatën nga njëra anë, ndërsa nuk po shkarkojnë të vjetrin. Kështu që, mesa duket dhe në bazë të informacioneve që kemi, ai grupi i Veliaj ka atë hatërmbetjen e vet. Dhe normalisht, kryeministri dëshiron që vendimmarrja të jetë me të gjitha votat e Partisë Socialiste, ndonëse harron që do të ketë edhe të gjitha votat e Partisë Demokratike. Do të jetë një nga vendimet që do të miratohet me 61 kartonët e Këshillit Bashkiak, por do që brenda partisë së vet, të jetë një vendimmarrje unanime. Gjë që mesa duket nuk e ka arritur dhe i mbledhin sot, do t'i bëj atë rezymenë e radhës, trajnimin e radhës, për t'i thënë se sa e rëndësishme është të mblidhemi dhe të votohet”, tha Teliti./ CNA





Lajmet e fundit nga