web counter
LEXO PA REKLAMA!

SHKARKO APP

App Store
Google Play

E fundit!

x

Samiti i Komunitetit Politik Evropian në Armeni/ Rama dhe Kurti mes liderëve pjesëmarrës

3 Maj 2026, 14:22, Politikë CNA

Samiti i Komunitetit Politik Evropian në Armeni/ Rama dhe Kurti mes

Kryeministri Edi Rama do të udhëtojë drejt Yerevanit të Armenisë për të marrë pjesë në punimet e Samitit të Komunitetit Politik Evropian. Rama do të jetë i pranishëm të dielën, në darkën e mirëseardhjes të shtruar nga Presidenti i Republikës së Armenisë, Vahagn Khachaturyan, dhe Kryeministri i Republikës së Armenisë, Nikol Pashinyan.

Në kuadër të Samitit, Kryeministri Rama do të marrë pjesë në takimin e dytë informal të Koalicionit Europian Kundër Drogave (ECAD), i cili do të bashkëkryesohet nga Presidenti francez Emmanuel Macron dhe Kryeministrja e Italisë Giorgia Meloni.

Diskutimet do të përqendrohen në forcimin e luftës kundër trafikut të drogës, përfshirë trafikun detar dhe në porte, luftën kundër flukseve të paligjshme financiare, pastrimit të parave dhe korrupsionit, si dhe adresimin e sfidave që lidhen me drogat sintetike në Europë.

Kreu i qeverisë do të marrë pjesë në tryezën e rrumbullakët të bashkëkryesuar me Kryeministrin e Finlandës Petteri Orpo, me temë “Forcimi i lidhshmërisë dhe sigurisë ekonomike në kontekstin e tranzicionit të gjelbër”. 

Ndërkohë bëhet me dije se pjesë e samitit, do të jetë edhe kryeministri në detyrë i Kosovës, Albin Kurti. Sipas njoftimit të qeverisë, Kurti ka udhëtuar për vizitë zyrtare në Armeni për të marrë pjesë në Samitin e Komunitetit Politik Evropian. Po ashtu thuhet se ai pritet të ketë takime të nivelit të lartë me zyrtarë dhe liderë shtetesh pjesëmarrëse. Kurti po ashtu, do të jetë pjesëmarrës në konferencën ndërkombëtare Yerevan Dialogue.

Samiti i këtij viti, që mbahet më 4 maj, do të bëjë së bashku 48 kryetarë shtetesh dhe qeverish nga i gjithë kontinenti nën moton “Ndërtimi i së Ardhmes: Uniteti dhe Stabiliteti në Europë”, ndërkohë që Kryeministri i Kanadasë Mark Carney, do të marrë pjesë si i ftuar në samit, duke shënuar herën e parë që një vend jo-europian merr pjesë në takim. Në një kohë transformimesh të thella gjeopolitike, diskutimet do të fokusohen në forcimin e bashkëpunimit ndërmjet vendeve europiane, koordinimin e veprimeve për rritjen e qëndrueshmërisë demokratike, si dhe avancimin e lidhshmërisë dhe sigurisë ekonomike e energjetike.

Komuniteti Politik Evropian është lansuar më 2022, si ide e presidentit të Francës, Emmanuel Macron, pas nisjes së pushtimit rus të Ukrainës, si një lloj forumi ndërqeveritar për diskutime politike lidhur me të ardhmen e Evropës. /CNA





Lajmet e fundit nga