Qurravitjet e Veliajt për mediat

6 Prill 2024, 13:36, Politikë CNA

Erion Veliaj

Erion Veliaj u ankua sot për qëndrimet e mediave ndaj drejtorëve të tij të arrestuar me vendim gjykate për korrupsion dhe shpërdorim detyre me dosjen “5D”.

Lali Eri i ka quajtur spiunë dhe prokurorë gazetarët që kanë raportuar vjedhjet e bashkëpunëtorëve të tij.

Në fakt duhet të mësojë se raportimet kanë qenë të sakta dhe mbi to janë ngritur akuza. I pëlqen ose jo, janë dhënë edhe vendime me prova deri në komunikime telefonike.

Tani ky Veliaj që 80% e mediave nuk ia raportuan lajmin pse mërzitet, kur të njëjtët megafonë propagandistikë të pushtetit ulërisnin për drejtorin e rrugëve, apo bërtasin për shumë arrestime nga SPAK-u dhe për këto të Veliajt u iku zëri?

Ç’pati lali, pse u shqetësua?

Ato media që s’e raportuan hiç, minimalisht edhe sot duhet të heshtnin, por kanë dalë si megafonë mediatikë të japin zërin e Lalit, i cili në deklarimet e tij sa i lëpihej dhe kërcënonte Ramën, apo dridhej me emrin e SPAK-ut, shiste drejtorët e tij që më parë s’i pranonte dhe në fund i quante bashkëpunëtorë. Pas 10 ditësh doli dhe foli, përpara se të shkojë dhe të flasë përpara prokurorëve të SPAK-ut.

Deklarata e Veliajt:

Ku jemi këtu? Në komunizëm? Kur shoku Enver u vinte mbrapa një parti të tërë e një armatë të tërë me spiunë, të gjithë zyrtarëve të shtetit, deri te vrima e çelësit e shtëpisë së tyre, që sot u dashka të arrestohet e të burgoset nga gjykata politiko-mediatike, titullari i institucionit, sapo SPAK-u nxjerr fletët e arrestit për një apo disa zyrtarë të institucionit disa mijëra vetash që ai drejton?!

I ngre këto pyetje retorike sepse në asnjë vend normal demokratik, nuk ndodh kjo gjueti shtrigash. Në parlamente, ekrane, portale, madje as në rrjetet sociale të Francës, Italisë, Greqisë e me radhë, nuk i shikon këto turra drush për të djegur të gjallë Presidentë, kryeministra, kryetarë bashkish, kur drejtësia thjesht po bën punën e saj në luftën kundër korrupsionit dhe ku gjykatat, në fund, e ndajnë shapin nga sheqeri, të fajshmit nga të pafajshmit!

Këta gjahtarët profesionistë të shtrigave, që kanë një mandat deputeti të partive me vulë të humbur apo një kravatë moderatori dhe analisti në kolltukët e spektakleve politike televizive të çdo mbrëmjeje, po që s’kanë asnjë respekt për dinjitetin njerëzor, për punën, për faktet, duan që populli ta harrojë këtë të vërtetë të madhe./CNA