"Pse opozita nuk çlirohet nga një 80-vjeçar?"/ Noka: Berisha është misionar, kush është Edi Rama?

24 Prill 2025, 22:46, Politikë CNA

"Pse opozita nuk çlirohet nga një 80-vjeçar?"/

Sekretari i Përgjithshëm i PD-së Flamur Noka, ka deklaruar se kreu i PD-së Sali Berisha është një misionar i vërtetë dhe se faktori moshë nuk ndikon në garën përballë mazhorancës.

I ftuar në MCN TV, i pyetur pse opozita nuk çlirohet dot nga një 80-vjeçar, Noka e krahason me presidentin e SHBA Donald Trump duke thënë se pavarësisht moshës është lideri i botës.

“Keni rënë në kurth në këtë skemë pyetjesh. Çfarë do të thotë moshë? Sa është Presidenti Trump? Ai sot është lideri i botës. Alternativë për shqiptarët është ai që jep zgjidhje për shqiptarët. Sali Berisha, u rikthye jo për veten e tij dhe jo për karrigen e tij. I ka ezauruar etapat e pushtetit, ka qenë kryeministër, President. U rikthye në parti për të shpëtuar partinë dhe e shpëtoi. Partia ishte peng i Edi Ramës. Është rikthyer për të shpëtuar shoqërinë shqiptare që po shkatërrohet. Sali Berisha është misionar dhe është i vetmi misionar në politikën shqiptare. E nisim, kush është Berisha dhe kush është Edi Rama? Berisha ishte në dhjetor 90’, që përmbysën komunizmin dhe sollën demokracinë. Anëtarësimi në OSBE dhe Këshill i Evropës. Ardhja e TAP në Shqipëri, arritje madhështore. Rilindja nuk e shfrytëzoi për të gazifikuar Shqipërinë. Futi Shqipërinë në NATO. Mund të më thoni një arritje të Ramës?”, tha Noka.

Ndër të tjera, Noka u shpreh se kryeministri Rama është një njeri i tillë që edhe Krishtin po ta kishte kandidat do të futej te radhët e atyre që e kryqëzon.

“Edi Rama është njeri i tillë, që edhe Krishtin po ta kishte kandidat do të futej te radhët e atyre që e kryqëzon.

Ky është Edi Rama dhe është normale që kundërshtari në fushatë të demonizojë kundërshtarin e tij. Berisha ësht njerëzor nuk është hyjnor. Kemi bërë edhe ne gabime, nuk do të dilnim në opozitë. Por në çdo arritje të këtij vendi është Berisha. Gjeni një arritje të Ramës, Shqipëria Kolumbi me drogë, Shqipëria Meksikë, meritë e Edi Ramës. Shqipëria në kthetrat e krimit të organizuar. Në Shqipëri qeveris mafia. Shqipëria vendi i fundit në botë për arsimin. Përpara nesh është edhe Palestina dhe Ukraina, që janë në luftë”, deklaroi Noka./ CNA