web counter
LEXO PA REKLAMA!

SHKARKO APP

App Store
Google Play

E fundit!

x

Presidenti i KE-së viziton Ballkanin Perëndimor/ Takim me liderët rajonalë, ja kur vjen në Tiranë

28 Maj 2026, 15:29, Politikë CNA

Presidenti i KE-së viziton Ballkanin Perëndimor/ Takim me liderët

Presidenti i Këshillit Europian, António Costa, do të udhëtojë javën e ardhshme drejt Ballkanit Perëndimor.

Bëhet fjalë për datat 1-5 qershor dhe pjesa kryesore e agjendës lidhet me takime të shumta me udhëheqësit e rajonit. Po ashtu, Costa pritet të bashkëkryesojë Samitin BE-Ballkani Perëndimor në Tivat të Malit të Zi më 5 qershor.

Bazuar në të dhënat e kësaj vizite disaditore në Ballkanin Perëndimor, të publikuar nga BE, Costa do të nisë takimet në Sarajevë të hënën, më 1 qershor, kur do të takohet me anëtarët e Presidencës së Bosnjës dhe Hercegovinës, Denis Becirovic, Zeljka Cvijanovic, Zeljko Komsic dhe Kryetaren e Këshillit të Ministrave, Borjana Kristo.

Të martën, më 2 qershor, Presidenti Costa do të jetë në Tiranë, ku do të takohet me Kryeministrin Edi Rama, Presidentin e Republikës Bajram Begaj dhe studentët e Kampusit të Tiranës të Kolegjit të Evropës. Më pas ai do të vizitojë Shkupin, për t'u takuar me Kryeministrin Mickoski.

Të nesërmen, të mërkurën, më 3 qershor, Presidenti Costa do të shkojë në Prishtinë, për t'u takuar me Presidenten në detyrë Albulena Haxhiu, Kryeministrin në largim Albin Kurti dhe kryetarët e partive opozitare.

Të enjten, më 4 qershor, Presidenti Costa do të takohet në Beograd me Presidentin Aleksandar Vuçiç, Kryetaren e Parlamentit Ana Brnabiç dhe organizatat e shoqërisë civile. Turneu do të përfundojë në Mal të Zi, ku Presidenti Jakov Milatovic ka ftuar udhëheqësit në një darkë në Tivat për të festuar 20-vjetorin e rivendosjes së pavarësisë së vendit.

Më 5 qershor, Presidenti Costa do të bashkë-kryesojë Samitin BE-Ballkani Perëndimor. Tema qendrore e këtij samiti është "Prosperiteti dhe stabiliteti i përbashkët i BE-së dhe Ballkanit Perëndimor"./CNA





Lajmet e fundit nga