Përgënjeshtruan shitblerjen e votës në Dibër/ Sheferedin Shehu ironizon policinë dhe prokurorinë

13 Maj 2023, 15:42, Politikë CNA

Përgënjeshtruan shitblerjen e votës në Dibër/

Ish-zv.ministri i Financave, Sherefedin Shehu

Ditën e djeshme u raportua në media për përplasje në Dibër, ku kandidati i koalicionit “Bashkë Fitojmë” Ismail Uka denoncoi se kishte kapur një rast të shit-blerjes së votës.

Por policia dhe prokuria e mohoi këtë lajm, ndërsa mesditën e sotme ka reaguar ish-zv.ministri i Financave, Sherefedin Shehu.

Me anë të një statusi në rrjetet sociale, Shehu deklaron se policia dhe prokuroria e “reformuar” nga Amerika dhe Bashkimi Europian nuk i quan blerje vote qokat dhe lajthitjet e kryeministrit Edi Rama.

Ai deklaron se për policinë problemi në këto zgjedhje është vetëm kandidati i opozitës në Bashkinë Himarë, Fredi Beleri dhe një furgon në Bashkinë Shkodër.

Deklarata e plotë:

Qokat dhe lajthitjet e Ramës nuk quhen blerje vote për policinë dhe prokurorinë e “reformuar” nga Amerika dhe Bashkimi Europian.

Nuk quhet presion mbi votuesit dhe blerje vote deklarata publike e Kryeministrit se “po votuat opozitën nuk ju jap kokërr leku” edhe pse lekët janë tuajat.

Nuk quhet shpifje dhe presion mbi votuesit sharja, ofendimi dhe degradimi pa fakte i kandidatëve të opozitës nga Kryeministri i vendit.

Nuk quhet blerje vote:

Dhënia e 5 mijë lekëve për pensionistët në muajin e zgjedhjeve;

Shtimi në muajin e zgjedhjeve me 20% (përqind) i punonjësve me kontratë në borderotë e të gjitha Bashkive;

Shtimi në muajin e zgjedhjeve me 25% (për qind) i përfituesve të ndihmës ekonomike në shkallë vendi;

Hapja masive në muajin e zgjedhjeve e tenderave me financim 10% të vlerës;

Shpërndarja derë më derë e parave nga Drejtori i IKMT Dibër dhe shumë të tjerëve të denocuar publikisht;

Përmbysja në arat e Kllobçishtit e makinës së Drejtorit të Sigurimeve Shoqërore në Dibër duke u arratisur për të mos ju kapur paratë për vota që kishte në makinë.

Ndërtimi pa leje, studim dhe buxhet i fabrikës së asfaltit nga kryemashtruesi i Tiranës,

Asfaltimi natën i rrrugëve, rrugicave dhe qosheve pa tender, kontratë dhe afishim publik në Tiranë, Berat, Fier, Tepelenë e në shumë Bashki të tjera

Dhe shumë bëma të tjera që i dëgjojmë përditë dhe nuk i merr dot kalemi.

Por, për policinë që nuk duhet ta duam dhe prokurorinë e “reformuar” nga Amerika dhe Bashkimi Europian problemi në këto zgjedhje qenka kandidati i opozitës në Bashkinë Himarë dhe një fugon në Bashkinë Shkodër.

Ku është elita e Shqipërisë që nuk flet! Po analistët e “Pavarur”! O popull! Dili zot vetes! Sepse, me Edi Ramën Shqipëria do të bëhet më keq se sa ishte me Enver Hoxhën dhe Ramiz Alinë./ CNA.al