web counter
LEXO PA REKLAMA!

SHKARKO APP

App Store
Google Play

E fundit!

x

PD në një vit/ Nga zgjedhjet, te 'farsa', rikthimi në Kuvend dhe protestat kundër qeverisë

2 Janar 2026, 11:40, Politikë CNA
PD në një vit/ Nga zgjedhjet, te 'farsa', rikthimi në
Selia e Partisë Demokratike

Për Partinë Demokratike, viti 2025 ishte i vështirë, i karakterizuar nga rezultati në zgjedhjet parlamentare dhe akuzat e shumta ndaj qeverisë dhe drejtësisë.

Fillimin e vitit, PD e nisi me një protestë në 8 shkurt para Kryeministrisë, ku u bllokuan disa nga rrugët kryesore të qytetit për orë të caktuara gjatë protestës.

PD në një vit/ Nga zgjedhjet, te 'farsa', rikthimi në
Protesta e 8 shkurtit

Partia Socialiste, nën udhëheqjen e Edi Ramës, kishte shumicën dhe nisi përgatitjet për buxhetin dhe agjendën e legjislacionit të vitit, ndërsa opozita ishte në pozicion kritik kundër shumicës.

PD dhe deputetë të tjerë opozitarë akuzuan shumicën për mënyrën si po trajtoheshin çështjet e rëndësishme, duke e cilësuar si një ngutshmëri të njëanshme dhe pa konsultime të duhura me opozitën në Kuvend.

Sidoqoftë, shumica socialiste shpesh rrëzonte amendamentet dhe propozimet e opozitës, duke miratuar vendimet me shumicë votash, gjë që krijoi pakënaqësi brenda radhëve opozitare.

PD në një vit/ Nga zgjedhjet, te 'farsa', rikthimi në
Kryedemokrati Berisha gjatë fushatës

Më tej, Partia Demokratike përqendroi aktivitetin e saj opozitar te përgatitja për zgjedhjet parlamentare të 11 majit. PD filloi fushatën e brendshme për listat e kandidatëve, duke zhvilluar debate brenda partisë mbi strategjinë dhe zgjedhjen e figurave më të besueshme për të përfaqësuar opozitën në çdo qark. Nga radhët e PD-së pati pakënaqësi dhe largime pas vendosjes në lista të hapura më të votuarit e primareve.

PD zhvilloi takime me qytetarët në qarqe të ndryshme, nga veriu në jug dhe intensifikoi fushatën zgjedhore për zgjedhjet e 11 majit. Aktiviteti kombinoi mobilizimin e bazës, takimet me qytetarët dhe aksionin parlamentar.

Pavarësisht se morën strategun e fushtës së presidentit amerikan Donald Trump, Chris LaCivita nuk prodhoi fitore për demokratët. 

PD në një vit/ Nga zgjedhjet, te 'farsa', rikthimi në
Berisha me konsulentin e fushatës, LaCivita

Në zgjedhjet e 11 majit, PD mori një rezultat thellësisht të dobët, krahasuar edhe me zgjedhjet e mëparshme dhe shënoi humbjen e thellë të pozicioneve parlamentare, rezultati më i keq në dekada për PD-në.

Partia Demokratike kontestoi rezultatet dhe theksoi parregullsitë në procesin zgjedhor, duke kërkuar përgjegjësi politike nga qeveria dhe transparencë në administrimin e votave. Sali Berisha deklaroi se PD nuk njeh rezultatin e zgjedhjeve dhe e cilësoi procesin si “farsë elektorale” dhe manipulim masiv.

PD në një vit/ Nga zgjedhjet, te 'farsa', rikthimi në
Mbledhja e PD-së pas zgjedhjeve

Gjatë korrikut dhe gushtit 2025, pavarësisht se Kuvendi kishte periudhën e ndërprerjes, Berisha vijoi konferencat me gazetarët duke denoncuar atë që ai e quajti 'farsë zgjedhore'. Gjatë shtatorit, PD u rikthye në kuvend me të njëjtat ide për farsën elektorale dhe akuzat ndaj qeverisë.

Berisha, i akuzuar për çështjen 'Partizani', vijoi me shënjestrimin e drejtësisë. Në çdo dalje nga SPAK-u, Berisha vijoi sulmet ndaj ish-kreut të Prokurorisë së Posaçme, Altin Dumanit, dhe akuzoi qeverinë për kapje të drejtësisë.

PD në një vit/ Nga zgjedhjet, te 'farsa', rikthimi në
Berisha në një nga daljet nga SPAK

Në nëntor, PD nisi foltoret e përjavshme para Kryeministrisë, me kërkesë largimin nga detyra të kryeministrit Edi Rama. Prej disa javësh, opozita protestoi duke akuzuar qeverinë për votimin e disa ligjeve pa konsensus me opozitën.

Pasi doli nga qelia, Ervin Salianji kërkoi në nëntor që të "vlerësohej" për burgun që bëri me një post në PD, por u përball me zhgënjim, pasi kryedemokrati Sali Berisha nuk i ndryshoi postet e demokratëve. 

Në këto kushte, Salianji zgjodhi të mbante foltore paralele me ato të Berishës dhe PD-së zyrtare, duke synuar përçarje brenda partisë, njësoj si ish-kryetari i tij, Lulzim Basha. Me këtë lëvizje, Salianji nuk mundi të mbledhë mbështetës të shumtë pas vetes. Lëvizja e tij u duk si një shërbim ndaj qeverisë Rama, për ta mbajtur sa më gjatë në pushtet.

PD në një vit/ Nga zgjedhjet, te 'farsa', rikthimi në
Përplasjet në Kuvend

Në dhjetor, Kuvendi u shndërrua në një arenë debati të fortë, ku opozita kërkoi transparencë, përgjegjësi dhe zbatim të ligjit nga mazhoranca.

Aksioni opozitar u kulmua me protestën Kombëtare të 22 dhjetorit, ku PD paralajmëroi të tjera protesta në vijim, si dhe artikuloi kërkesat e kahershme, largimin e Ramës, qeverinë teknike dhe zgjedhje të lira dhe të ndershme.

PD në një vit/ Nga zgjedhjet, te 'farsa', rikthimi në
"Foltorja"

Partia Demokratike, pavarësisht debateve, akuzave dhe protestave nuk arriti të rrëzonte qeverinë. Mbetet për t'u parë se çfarë do të prodhojë viti 2026 për partinë më të madhe opozitare dhe nëse synimet e saj do të arrijnë të konkretizohen./CNA 

 





Lajmet e fundit nga