PD: "Banka Shqiptare e Zhvillimit", një tjetër mekanizëm i shtrenjtë propagande i qeverisë

5 Qershor 2026, 16:03, Politikë CNA

Zëdhënësja për Antikorrupsionin në Partinë Demokratike, Genta Vangjeli, në një deklaratë për mediat nga selia blu ka akuzuar qeverinë se po ndërton një tjetër “mekanizëm të kushtueshëm propagande dhe klientelizmi” përmes krijimit të Bankës Shqiptare të Zhvillimit.

Vangjeli tha se megjithëse Kuvendi ka miratuar ligjin për krijimin e Bankës Shqiptare të Zhvillimit dhe qeveria ka dhënë 1 miliard lekë si kapital fillestar, institucioni ende nuk disponon një strategji, model funksionimi, strukturë operacionale apo plan të qartë zhvillimi.

Sipas saj, në vend që këto kapacitete të ndërtoheshin nga vetë shteti përmes ekspertizës institucionale, qeveria ka vendosur të hapë një tender të ri për konsulencë.

Ajo theksoi se, ndërsa qeveria flet për zhvillim, ekonomia shqiptare po përballet me mungesë financimi, bizneset e vogla po hasin vështirësi dhe shumë të rinj po largohen nga vendi.

Deklarata e plotë:

Qeveria shqiptare po ndërton një tjetër mekanizëm të shtrenjtë propagande dhe klientelizmi me emrin ‘Banka Shqiptare e Zhvillimit’, ndërsa qytetarët dhe bizneset vazhdojnë të përballen me taksa të larta, mungesë financimi dhe ekonomi të rrënuar.

Pasi Kuvendi miratoi ligjin për krijimin e Bankës Shqiptare të Zhvillimit dhe pasi qeveria derdhi 1 miliard lekë nga paratë e shqiptarëve si kapital fillestar, sot rezulton se institucioni ende nuk ka as strategji, as model funksionimi, as strukturë operacionale dhe as plan të qartë zhvillimi.

Në vend që këto kapacitete të ndërtoheshin nga vetë shteti përmes ekspertizës institucionale, qeveria ka vendosur të hapë një tjetër tender miliona eurosh për konsulencë.

3.3 milionë euro do të shpenzohen për një kompani private, e cila do të hartojë dhe konsolidojë kuadrin institucional, strategjik dhe operacional të Bankës.

Ndërkohë që propaganda flet për zhvillim, ekonomia reale po vuan mungesën e kredive, bizneset e vogla po mbyllen dhe të rinjtë po largohen nga Shqipëria.

Shqiptarët kanë të drejtë të dinë:

Pse një bankë shtetërore krijohet pa pasur paraprakisht strategjinë dhe strukturën bazë?

Ky është modeli i një qeverie që nuk ndërton institucione të forta, por ndërton skema të kushtueshme propagande dhe klientelizmi me paratë e qytetarëve shqiptarë. /CNA