"Në buxhetet e ardhshme do të mbështesim zhvillimin e IA-së"/ Rama: Praktikat e punës janë ura bashkëpunimi

1 Tetor 2025, 10:47, Politikë CNA

"Në buxhetet e ardhshme do të mbështesim zhvillimin e

Kryeministri Edi Rama, i pranishëm në ceremoninë e firmosjes së marrëveshjes mes Ministrisë së Infrastrukturës e Energjisë dhe Universitetit Politeknik të Tiranës, deklaroi se do të krijohen ura dhe kanale të reja bashkëpunimi mes qeverisë dhe universiteteve.

Rama deklaroi se në buxhetet e viteve pasardhëse do të ketë një fond për të mbështetur sfidat e Inteligjencës Artificiale në të gjitha programet universitare për t’u dhënë mundësi pedagogëve dhe studentëve të shfaqin talentin në këtë fushë.

Rama tha se IA barazon vendet pasi nuk ka rëndësi se në cilin vend të globit jeton për të bërë kapërcimin epokal.

"Ky aktivitet përbën një moment të rëndësishëm të bashkëpunimit mes qeverisë dhe universitetit.

Ky proces ka njohur zhvillime të vazhdueshme dhe eksperienca na ka mësuar se në bashkëpunimet me fakultete të ndryshme ka shumë për të bërë. Por përtej këtij programi që do të mundësojë rekrutimin për një numër studentësh ne duam të shkojmë edhe më tej dhe të artikulojmë edhe më shumë programe të posaçme.

Do të krijojmë ura dhe kanale të reja bashkëpunimi që shkojnë në funksion të përfitimit të ndërsjelltë që materializohet në jetën konkrete të studentëve dhe të materializohet te cilësia e punës së tyre.

Çdo vit kemi një numër të konsiderueshëm studentësh për të realizuar këtë tranzicion mes aulave dhe vendeve të punës.

Po bëjmë shumë përpjekje për të sjellë realitete të tjera akademike për t’u hapur ndaj botës apo për t’u dhënë mundësinë atyre që të marrin eksperiencat sikur të ishin jashtë.

Ky universitet po fuqizohet me dy struktura të reja moderne që do të krijojnë kushte optimale për studentët. Është shumë e nevojshme që të mbështesim universitetin me infrastrukturën dhe teknologjinë e nevojshme për të përqafuar ndryshimin epokal.

Ne do t'u japim mmundësinë pedagogëve dhe studentëve të shfaqin talentin në Inteligjencë Artificiale, sepse nuk ka rëndësi në cilin vend të botës jeton, bëhen kapërcime epokale pavarësisht vullnetit.

Në buxhetet e viteve të ardhshme do të kemi një buxhet ku do të mbështesim të gjitha sprovat, u bëj thirrje pedagogëve dhe studentëve që të angazhohen më shumë për rritjen e komponentit të inteligjencës artificiale në të gjitha programet universitare", deklaroi Rama.

Kryeministri Rama shkëmbeu batuta edhe me studentët e pranishëm dhe i këshilloi djemtë që të mos mërziteshin që mundësia e praktikave iu dha vetëm vajzave pasi ato janë më të përparuara se djemtë dhe burrat.

Rama tha se duhen njerëz në sfidë me veten.

"Nuk kemi probleme me barazinë gjinore, por programi ështe i tillë dhe nuk kemi pse ta refuzojmë pasi është në ndërveprim me një institucion ndërkombëtar. Djemtë të mos e humbin durimin për mbështetjen ndaj vajzave dhe grave, pasi investimi te gratë dhe vajzat është më i miri. Ne na duhen sa më shumë njerëz në sfidë me veten. Si përfaqësues i gjinisë më të dobët duhet të pranoj se gratë janë më parë se ne dhe duhet të pranojmë se duhet të punojmë që të arrijmë në lartësinë e tyre e t’u qëndrojmë në krah me shumë dinjitet", tha kryeministri./CNA