web counter
LEXO PA REKLAMA!

SHKARKO APP

App Store
Google Play

E fundit!

x

Muçollari: Zjarri në Tiranë, pasojë e një modeli të dështuar urban

16 Prill 2026, 10:12, Politikë CNA

Muçollari: Zjarri në Tiranë, pasojë e një modeli

Anëtari i kryesisë së Partisë Demokratike, Grigels Muçollari, deklaroi se zjarri i rënë në pallatin në zonën pranë Farmacisë 10, është pasojë e një modeli të dështuar të zhvillimit urban dhe jo një rastësi.

I ftuar në emisionin "Kafe Shqeto", Muçollari theksoi se ndërtimet pa standarde dhe mungesa e kontrollit institucional kanë rritur rrezikun për jetën e qytetarëve. Ai kritikoi gjithashtu ndikimin e kryeministrit Edi Rama në zhvillimin urban të Tiranës, duke pretenduar se shija e kryeministrit ka diktuar dhënien e lejeve të ndërtimit.

Sipas tij, fenomeni i ashtuquajtur kultura e fasadave ka favorizuar pamjen e jashtme të ndërtesave në dëm të sigurisë dhe cilësisë së tyre. Muçollari ngriti shqetësimin se shumë pallate të reja paraqesin rrezik për jetën e banorëve, duke e lidhur këtë me betonizimin masiv dhe mungesën e standardeve.

“Ajo që ka ndodhur nuk është më një rastësi, bëhet fjalë për një pasojë direkte të një modeli të dështuar të një zhvillimi urban. Një përqasje të kahershme tashmë të këtyre që na qeverisin prej më shumë sesa një dekade, ku ndërtimi dhe lejet e ndërtimit janë dhënë pa standard, pa kontroll. Atëherë, do ta shikoja në dy dimensione. E para njëherë, nëse e kemi vënë re, shija, ose shija e kryeministrit ka diktuar çdo lloj leje në kryeqytet. Dhe jo vetëm kaq, por është përdorur si një model për zhvillim.

Domethënë kjo tregon dhe një tendencë apo një kulturë, kultura e fasadave, të cilat e quaj unë, që shpreh filozofinë e qeverisjes, që do të thotë vetëm sipërfaqe dhe aspak përmbajtje. Dhe raste të përsëritura tashmë, sidomos në sektorin e ndërtimit, ku vihen në rrezik shumë jetë qytetarësh dhe jo vetëm kaq, por vihet në rrezik siguria, siguria publike, gati-gati në të gjitha pallatet e reja, shprehin pikërisht këtë qasje të qeverisë. Ne kemi të bëjmë me leje ndërtimi, betonizim masiv, pa standard, pa kontroll.

Dhe kjo lloj filozofie, e cila është mbështetur edhe si pasojë e një modeli ekonomik të, do të thoja, do ta quaja, pasi as model nuk quhet, në modelin nëpërmjet pastrimit të parave. Që do të thotë që nuk kemi të bëjmë me një zhvillim mbi planifikimin urban dhe as mbi interesin publik, por pikërisht mbi shije dhe mbi një model të caktuar ku zoti Rama prej më shumë se një dekade ka vendosur të furnizojë ekonominë nëpërmjet parave të pista. E gjitha, e gjitha kjo lloj, qeverisjeje, e gjitha kjo lloj përqasjeje, ka reflektuar dhe në rastin ku për fat të keq, shumë prej qytetarëve të Tiranës kanë humbur pasuritë e tyre, kanë humbur shtëpitë e tyre”, tha Muçollari.

Ai kërkoi një hetim të plotë të ngjarjes, auditim të të gjitha lejeve të ndërtimit dhe ndërhyrje urgjente për të garantuar sigurinë e qytetarëve, sidomos në prag të sezonit veror.

“Ka nevojë për një auditim të të gjitha lejeve dhe, sigurisht edhe respektimi i tyre, duhet audituar nga ndërtuesit. Në mënyrë që të gjenden përgjegjësit dhe në mënyrë që të vendoset një pikë fillimi për rindërtimin e një qyteti që i shërben interesit publik. Kështu që të gjitha këto fakte, besoj se duhet të jenë në qendër të opinionit publik, në qendër të diskut publik”, u shpreh Muçollari./ CNA





Lajmet e fundit nga