web counter
LEXO PA REKLAMA!

SHKARKO APP

App Store
Google Play

E fundit!

x

Martirët e 2 prillit/ Berisha, mesazh për qytetarët: Sakrifikoni për lirinë dhe votën

2 Prill 2025, 11:58, Politikë CNA

Martirët e 2 prillit/ Berisha, mesazh për qytetarët: Sakrifikoni

Sot kreu i PD-së, Sali Berisha, ka zhvilluar në Shkodër një ceremoni në nderim të 4 martirëve që u vranë më 2 prill të vitit 1991, në masakrën e fundit të komunizmit në Shqipëri, në Shkodër.

Berisha deklaroi se martirët e 2 prillit janë frymëzim i madh për çdo qytetar që duhet të sakrifikojë për lirinë dhe votën e tij.

“Sot jemi këtu për të shprehur nderimin tonë më të thellë, mirënjohjen më të pakufishme për martirët e votës së lirë. Heronjtë e vërtetë të Shkodrës dhe të mbarë Shqipërisë. Arben Brocin, themelues i pluralizmit dhe PD-së. Bujanar Bishanakun, aktivist i shquar. Nazmi Kryeziun, aktivist i shquar i PD-së dhe Besnik Cekën, aktivist i shquar i kësaj partie. Por ne nderojmë gjithashtu edhe 87 qytetarë të Shkodrës, që u plagosën në atë ditë masakre, të cilën Shkodra nuk e kishte regjistruar ndonjëherë në kohërat e reja në memorien e saj.

Më 2 prill të vitit 1991, diktatori i fundit stalinist në Europë, Ramiz Alia, i cili kishte pranuar zgjedhjet pluraliste, vendosi të festojë fitoren e grabitur në Shqipëri të zgjedhjeve me gjakun e të rinjve të Shkodrës nën motivin se pushteti do gjak, se pushteti vjen nga gjaku. Gjakësorë siç ishin, ata i dëshmuan Shkodrës dhe Shqipërisë se si pushtues të brendshëm, nuk dallonin aspak nga pushtuesit e tjerë.

Madje kishin pabesinë dhe mizorinë në shpirtin e tyre, nuk ngurruan të lajnë me gjak këtë qytet të bekuar. Të dashur miq, sakrifica sublime e martirëve të votës së lirë, të dhjetëra e dhjetëra qytetarëve të Shkodrës që u plagosën atë ditë, pati jehonë të jashtëzakonshme ndërkombëtare.

Zgjoi revoltën, dënimin e ashpër të mbarë opinionit demokratik europian, të Parlamentit Europian, Këshillit të Europës, Kongresit të SHBA-së. Me të vërtetë martirët e votës së lirë u ndanë atë ditë nga jeta, por mbetën të pavdekshëm në shpirtin e lirisë, në votën e lirë.

Ndaj dhe ata janë sot burim drite, burim frymëzimi për çdo qytetar që i beson lirisë dhe votës së saj. Martirët e 2 prillit janë frymëzim i madh për çdo qytetar të sakrifikojë për lirinë dhe votën e tij”, tha Berisha./ CNA





Lajmet e fundit nga