Lirimi i Salianjit/ Sula kritika demokratëve: E përcollën me "oiiiii", e pritën me xhelozi

9 Korrik 2025, 11:21, Politikë CNA

Lirimi i Salianjit/ Sula kritika demokratëve: E përcollën me

Deputeti i Partisë Demokratike, Dashnor Sula, me anë të një statusi në rrjetet sociale, ka reaguar për lirimin nga burgu të Ervin Salianjit dhe reagimin e strukturave të PD-së për lirimin e tij.

Sula e quan burgimin e Salianjit politik dhe thotë se pas lirimit të tij asnjë nga kryesia e PD-së nuk denjoi ta priste.

Më tej, Sula shkruan se udhëheqësit në PD ishin më të gëzuar kur u burgos Salianji sesa dje që u lirua nga qelia.

Kjo situatë, Sula thotë se tregon që në PD po zihen për postet brenda partisë dhe Salianji është një kandidat potencial për postet në PD.

Deputeti shprehet se janë bërë të gjithë bashkë për ta sfumuar Salianjin në parti.

Postimi i Dashnor Sulës

E percollën me “oiiiii”, e pritën me xhelozi.

Dje doli nga burgimi politik Ervin Salianji, pas afro 10 muajsh izolim te padrejtë. Për Salianjin shoë me pranga në duar është një medalje sakrifice në interes publik.

Por, dje paradite Salianji doli nga burgu dhe para se të takonte familjen e tij biologjike, u drejtua për te familja politike për të takuar anëtarët e familjes politike. Për tu vlerësuar!

Feedbacku që mori?!

Asnjë nga udhëheqësia nuk denjoi ta priste. Nuk e kuptoj se ku shkuan të gjithë ata te devotshmit që ishin gati që të ngujoheshin për të mos e lejuar që të ekzekutohej vendimi gjykatës?!

Pse ishin më të gëzuar ata udhëheqës madhorë kur Salianji po shkonte në burg se sa tani që doli. Dje do duhet që të ishte një moment feste për Partinë Demokratike, por në fakt ndodhi e kundërta.

Ajo që ndodhi dje në PD, dëshmon më së miri situatën ku ndodhet partia. Nuk kanë mëndjen as për të fituar dhe as për të fituar por po zihen për ato postet brënda partisë dhe ndonjë post në Parlament. Për postet në parti, Salianji është një kandidat potencial ndaj “galloshet” janë bërë të gjithë bashkë për ta sfumuar pa ardhur Salianjin.

Edhe një herë PD dëshmon se nuk synon maksimalizim por do të ruaj statuskuon. Janë luftëtarët më të paepur për të luftuar njëri-tjetrin./ CNA