"Jemi riorganizuar"/ Rama: Në Tiranë një situatë jo e zakonshme, i mungon drejtimi prej kohësh

21 Korrik 2025, 08:59, Politikë CNA

"Jemi riorganizuar"/ Rama: Në Tiranë një situatë

Kryeministri Edi Rama ditën e sotme është rikthyer me rubkrikën “Sy m’sy” në rrjetet sociale, ku ka folur për lirimin e hapësirave publike.

Në përgjigjet e tij për komentuesit, Rama u ndal veçanërisht te kryeqyteti, për të cilin tha se ndodhet në një situatë të pazakontë, pasi i mungon drejtimi prej disa kohësh.

Për këtë arsye, tha Rama, socialistët janë riorganizuar dhe deputetët e Tiranës janë vendosur në një pozicion edhe më kërkues.

Sa i përket aksionit për çlirimin e hapësirave publike, Rama deklaroi se kjo nuk është çështje vetëm e inspektorëve, por synohet që kontrolli i territorit të arrijë të bëhet nëpërmjet teknologjisë.

Më tej, kryeministri tha se është në proces nisja e monitorimit teknologjik të territorit, ku gjithçka do të survejohet nëpërmjet dronëve.

"Puna e inspektorëve në terren do të ballafaqohet me raportimet e dronëve", u shpreh Rama.

“Dy gjëra që më kanë bërë shumë përshtypje në Tiranë. Nga njëra anë transformimet pozitive që ka pësuar Tirana. Negative, në aspektin e një zgjerimi të kufijve të veprimtarisë së njësive të shërbimit në hapësirat publike. Gjë që e kam dëgjuar dhe nga qytetarët, kjo ishte baza e një shqetësimi.

Pasi zgjedhjet përfunduan me një rezultat të jashtëzakonshëm, kemi diskutuar për domosdoshmërinë që të kthehemi në territor. Deputetët e PS-së kanë qenë në territor në mënyrë të vazhdueshme, në disa qytete të mëdha, për t’u ritakuar me komunitetin.

Në Tiranë kemi një situatë jo të zakonshme, i mungon drejtimi prej kohësh, kemi riorganizuar veten duke vendosur deputetët në një pozicion edhe më kërkues. Nga të katër anët e kryeqytetit ka qenë e qartë kërkesa e komunitetit: na çlironi hapësirat publike.

Ka nevojë për një organizim të mëtejshëm, nuk është një çështje vetëm inspektorësh dhe inspektimesh, është një çështje e vendosjes së një niveli tjetër e kontrolleve nëpërmjet teknologjisë.

Jemi në proces për të nisur monitorimin teknologjik të strukturuar të territorit ku do të mund të ndjekim gjithçka ndodh në territor përmes dronëve dhe do të marrim informacion për gjithçka që ndodh. Puna e inspektorëve në terren do të ballafaqohet me vëzhgimin e teknologjisë.

Nuk është një proces që nuk synon harmoni mes interesit të qytetarëve, atyre që kanë nevojë për hapësirat e tyre dhe atyre që ofrojnë shërbime, që bëjnë një biznes të vogël në këto hapësira.

Hap pas hapi do të krijojmë një vijë, ku 70% e trotuarit do të jetë për njerëzit dhe 30% për karriget.

Nuk merret qeveria me tavolinat dhe karriget, jemi në kushtet e mobilizimit për t’i dhënë një zgjidhje shqetësimit të qytetarëve për asfiksimin e hapësirave publike”, tha Rama./ CNA