KAS zbardh vendimin për Rrogozhinën, "koalicioni nuk kërkoi pavlefshmëri"

15 Qershor 2023, 14:41, Politikë CNA

KAS zbardh vendimin për Rrogozhinën, "koalicioni nuk kërkoi

Foto ilustruese

Nënkryetari Oerd Bylykbashi, disa ditë më parë akuzoi KAS-in si organ që i refuzoi koalicionit "Bashkë Fitojmë, shpalljen e pavlefshmërisë së zgjedhjeve në Bashkinë Rrogozhinë.

Ai argumentoi dhe analizoi rastin e votimit në Rrogozhinë ku kandidati Shkëlqim Hoxha humbi ndaj kandidatit të PS-së me një rezultat të ngushtë në atë që u quajt si "Kutia e Burgut".

Bylykbashi foli për pavlefshmëri të votimit në burgun e Rrogozhinës!

Ndërkohë KAS -i ka zbardhur vendimin lidhur me Rrogozhinën.

Siç paralajmëroi CNA.al, në KAS kjo temë nuk ishte kërkuar dhe as trajtuar fare nga përfaqësuesit e subjektit nën siglën e të cilit garonte Shkëlqim Hoxha.

Në KAS nuk u kërkua asnjëherë pavlefshmeria e kutisë së burgut.

Oerd Bylykbashi:

Nëse KAS-i do kish zbatu ligjin dhe do të shpallej e pavlefshme kutia e burgut ne Rrogozhinë, sot do ishim në ripërsëritje zgjedhjesh në Rrogozhinë.

Ndryshe nga Kuçova ku kërkesa për pavlefshmëri ishte e qartë, në Rrogozhinë termi "pavlefshmëri zgjedhjesh" ishte temë që nuk duhej prekur as nga përfaqësuesit e koalicionit as nga avokatët e kandidatit Hoxha.

Seancat e mbledhjeve të KAS-it kanë qenë publike dhe nga ato seanca kuptohet që përfaqësuesi i PD-së nuk kërkoi asnjëherë që KAS të shpallte pavlefshmërinë e votimit në burgun e Rrogozhinës.

Pavlefshmeria e kutisë së burgut as nuk u pretendua ndonjëherë në KAS në rastin e Rrogozhinës.

Për Rrogozhinën ankuesit donin që thjesht të hiqej nga rezultati përfundimtar, rezultati i votave te kutia burgut duke pretenduar fitoren në tavolinë dhe jo pavlefshmëri sipas Kodit Zgjedhor.

Kërkesa e "Bashkë Fitojmë" praktikisht mund të perifrazohej si:

- na hiqni nga tabela përfundimtare votimin në burg, meqë vetem ai prish punë, por mos e shpallni të pavlefshme kutinë e burgut meqë kështu na prishni punë.

Ankesat për kutinë e burgut nuk konkludonin asnjëherë me ndonjë kërkesë për pavlefshmëri të votimit në burgun e Rrogozhinës.

Kutia e burgut mbartte rezultatin e zgjedhjeve dhe sipas Kodit Zgjedhor pavlefshmeria e asaj kutie çon automatikisht në pavlefshmëri të zgjedhjeve për gjithë zonën zgjedhore.

Gjithë sa argumentoi CNA.al vërtetohet tashmë edhe nga vendimi i zbardhur i KAS-it për zgjedhjet në Rrogozhinë.

Por procesi ankimor vazhdon në Kolegjin Zgjedhor. Në çdo rast duhet që Kolegjit t'i vihen në tavolinë provat e manipulimeve në kutinë e burgut të Rrogozhinës dhe jo kërkesa për fitore të zgjedhjeve në tavolinë.

Nuk ka as KAS e as Kolegj që në 2023-shin, të jep fitoren në tavolinë./ CNA.al

KAS zbardh vendimin për Rrogozhinën, "koalicioni nuk kërkoi