web counter
LEXO PA REKLAMA!

SHKARKO APP

App Store
Google Play

Ibrahimaj i kundërpërgjigjet Tabakut me foto/ Tregon ndryshimet në Thumanë

30 Mars 2023, 11:45, Politikë CNA
Ibrahimaj i kundërpërgjigjet Tabakut me foto/ Tregon ndryshimet
Ministrja e Financave Delina Ibrahimaj

Ministrja e Financave, Delina Ibrahimaj, i është përgjigjur deputetes Jorida Tabaku në lidhje me fondet për rindërtimin.

Përmes një fotoje, Ibrahimaj tregoi ndryshimet që janë bërë në Thumanë pas tërmetit.

Ajo tha se rindërtimi vijon me ritme të shpejta dhe pohoi se të gjitha fondet e rindërtimit janë të tenderuara dhe tashmë janë subjekt i KLSH-së. 

Ndër të tjera theksoi se ka pasur transparencë sa u përket fondeve, duke iu përgjigjur akuzave të Tabakut.

"S'e di ku e gjeni forcën që thoni se tërmeti po përdoret për qëllime elektorale. Qeveria e ka për detyrë që t'i gjendet pranë çdo shqiptari. Fill pas tërmetit ne u përballëm me pandeminë dhe këto janë ngjarje që nuk mund të merren si të veçanta apo të shkëputura. Kemi një proces rindërtimi që po vazhdon me ritme të shpejta ndonëse ka pasur dy kriza të njëpasnjëshme. Kjo na jep një mundësi që të tregojmë se si ne arritëm që të transformojmë lagje të tëra dhe t'u japim një shpresë shqiptarëve.

Tërmeti kishte shkaktuar një dëm total prej 1 mld eurosh. Pati shumë njësi banimi të cilat u dëmtuan. Në kushtet e emergjencës qeveria shqiptare u angazhua përmes mekanizmit të fondit rezervë dhe e akorduan për të dëmtuarit nga tërmeti. Si në asnjë vend tjetër të botës në një kohë rekord të dëmtuarit nga tërmeti u akomoduan në hotele dhe jo në çadra.  Nuk ka detyrime të prapambetura nga fondi i rindërtimit.

Të gjitha fondet e rindërtimit janë tenderuar si çdo projekt tjetër. Të gjitha janë subjekte të KLSH-së. Ju ftoj që kur hidhni këto supozime të vini me shifra e projekte konkrete. Jo me supozime të dëgjuara në ambiente e kafene. Kam fakte që u them nuk janë kështu. Programi i rindërtimit ka një dimension të rëndësishëm social. Shkollat me financim të huaj sapo kanë filluar që të rindërtohen. Kemi angazhuar buxhetin e shtetit për shkak të emergjencës, dhe kreditë do të përdoren në të ardhmen.

Ne kemi dhënë informacion sa herë që është kërkuar. Kemi pasur transparencë maksimale për përdorimin e fondeve. Është e rëndësishme që të mos hidhet baltë mbi një proces për të cilin qeveria shqiptare ka marrë përgëzime dhe merita"- tha Ibrahimaj./ CNA.al





Lajmet e fundit nga