E fundit!

22:46 Aktualitet

Pas ndeshjes, protestuesit zhvendosen te selia e PD-së: Opozitë e shitur

Pas ndeshjes, protestuesit janë zhvendosur para selisë së ...

Eduard Shalsi dhe Rilindja, si akullore të kontaminuara

3 Shtator 2024, 10:51, Politikë CNA

Eduard Shalsi

Në muajin korrik pati një debat të ashpër në Komisionin e Ekonomisë dhe Financave mes Eduard Shalsit dhe kreut të KLSH-së, Arben Shehu, për akulloret e kontaminuara.

Gjithçka nisi pas deklaratës së kreut të KLSH-së, i cili tha se në vitin 2021 janë tregtuar akullore të kontaminuara me oksid etileni që shkaktojnë tumor, leucemi dhe ndikojnë në aftësinë riprodhuese te meshkujt.

Në lidhje me tregtimin e akulloreve të kontaminuara, kreu i KLSH-së nënvizoi se AKU-ja është njoftuar menjëherë dhe duhet të merrte masa për të ndaluar qarkullimin e tyre, por pretendoi se ky institucion nuk kreu asnjë veprim dhe nuk e bllokoi këtë produkt.(lexo këtu)

“Në 27.7.2021 u zbuluan markat e akulloreve, oksid etileni në akulloret e prodhuara në Francë, u zbulua nga Spanja që më pas ka njoftuar në sistemin ras 47 shtete, për kontaminimin e akullores me oksid otileni në disa akullore. Me pas në 30/7/2021 ka ardhur e-mail, drejtuesit e AKU-së për këtë gjë. AKU është njoftuar menjëherë dhe duhet të merrte masa për të ndaluar qarkullimin e akulloreve të kontaminuara. Oksidi i etilenit shkakton kancer, leucemi, ndikon në aftësinë riprodhuese te meshkujt. AKU nuk kreu asnjë veprim, nuk e bllokoi këtë produkt”, theksoi Shehu.

Shehu tregoi se janë konsumuar 13.2 tonë akullore me oksid etileni, teksa produktet janë shitur kryesisht në: Tiranë, Durrës, Fier, Elbasan, Vlorë, Berat, Lushnjë, Korçë, Shkodër, Sarandë, Krujë, Burrel, Peshkopi, Tropojë dhe Lezhë.

Këtë deklaratë të kreut të KLSH-së, që në fakt tronditi opinionin publik, në Komisionin e Ekonomisë dhe Financave, Eduard Shalsi tentoi me qëllim ta trajtonte politikisht, duke debatuar me zyrtarin e lartë. Ai filloi t'i kërkonte "llogari" pse nuk u raportua më herët, por gati 3 vite me vonesë.

Qëllimi i vetëm i mazhoranës ishte të mos merrej me thelbin e debatit, por të sulmonte KLSH-në, një nga institucionet e pavaruara në vend. Kjo u tregua qartë edhe me rastin e Mimoza Dhëmbit.(lexo këtu)

Gjithsesi nuk mungoi një përgjigje edhe nga kreu i KLSH-së, i cili theksoi se dosja është referuar në institucionet përkatëse, të cilat janë njoftuar në kohë.

Thelbi i çështjes është që akulloret e kontaminuara janë konsumuar nga shqiptarët. Pyetjet që lindin janë: Çfarë masa kanë marrë autoritetet pas alarmit të vënë nga KLSH-ja? A ka pasur një hetim për këtë çështje? A kanë vepruar institucionet në kohë?

Pas deklaratës së Shehut erdhi edhe një reagim nga Autoriteti Kombëtar i Ushqimit, ku theksoi se brenda 7 ditësh u tërhoq e gjithë sasia nga tregu, por KLSH tregoi të kundërtën. (lexo këtu)

Por çështja është më e thellë se kaq.

Burime për CNA bëjnë me dije se Kontrolli i Lartë i Shtetit ka bërë një kallëzim në Prokurorinë e Tiranës për akulloret e kontaminuara që ndodheshin në treg, por organi i akuzës nuk ka filluar një hetim.

Çuditërisht edhe prokurori që nuk ka hetuar çështjen është një nga njerëzit me lidhje të forta me mazhorancën që shkojnë deri në nivele më të larta të Rilindjes.

Por theksojmë se është skandaloze të mos hetohet kjo çështje, pasi këto akullore të tregtuara shkaktojnë sëmundje të rënda si tumor, leucemi dhe ndikojnë në aftësinë riprodhuese te meshkujt.

Në fakt duhet të hetohej dhe të viheshin para drejtësisë personat përgjegjës. Kemi të bëjmë me rrezik të jetës së njeriut dhe është e papranueshme që të mos ketë hetim nga organi i akuzës, aq më tepër kur kallëzimi bëhet nga Këshilli i Lartë i Shtetit, i cili ka kryer një sërë verifikimesh.

Theksojmë se nga Prokuroria e Tiranës pati një hetim të përciptë edhe për skandalin tek Onkologjiku, gjithçka ishte "shumë zhurmë për asgjë".

Skandali për trajtimin e të sëmurëve me kancer, tashmë ndodhet në duart e SPAK-ut, pasi Prokuroria e Tiranës shpalli moskompetencë.

Ky rast tregon edhe njëherë gjendjen në të cilën ndodhet organi i akuzës, i cili refuzon të hetojë çështje me rëndësi./CNA